Bıylǵy kóktemde oblystyq kásipkerlik basqarmasy óz isin ashýǵa qulshynysy bar jastardy qoldaýǵa baǵyttalǵan jobany qarjylandyrýǵa konkýrs jarııalaǵanda, jarty jyldyń ishinde Aqtóbe qalasy men aýdandarynan 78 joba kelip túsken. Túsken jumystardy kásipkerler, depýtattar men aqparat quraldary ókilderinen quralǵan komıssııa sońǵy eki aptadan beri tyńǵylyqty qarap, arasynan 16 jobany úzdik dep tanydy. Nátıjesinde, "Aýyldy kórkeıtý", "Mádenıet jáne bos ýaqytty durys uıymdastyrý", "Otbasylyq qundylyqtar jáne dástúr", "Bilim berýdiń kishi jobalary", "Salaýatty ómir saltyn ustaný", "Ekologııa jáne abattandyrý", "Týrızm" baǵyttary boıynsha Aqtóbe qalasynan -5, aýdandardan 11 joba ozyq dep tanyldy. Sonyń ishinde Baıǵanın aýdanynan – 4, Hromtaý aýdanynan – 2, Qobda, Muǵaljar, Áıteke bı, Temir, Mártók aýdandarynan bir-bir jobadan maquldandy. Endi joba avtorlarynyń árqaısysy 1 mıllıon 200 myń teńgeden bastap 2 mıllıon teńgege deıingi aralyqta grantqa ıe boldy.
Oblysta tuńǵysh ret uıymdastyrylǵan konkýrs jeńimpazdaryn marapattaǵan oblys ákimi Ońdasyn Orazalın bolashaq kásipkerlerdiń bastamalaryna sáttilik tileı otyryp, bıik nátıjelerge tek jańa bilim ıgerý men sheberlikti shyńdaý, tynymsyz eńbek arqyly qol jetkizýge bolatynyn atap ótti.
