"Prezıdentimiz Joldaýda ekologııalyq damý elimiz úshin aldyńǵy kezekte turǵan basymdyq ekenin atap kórsetti. Soǵan sáıkes memlekettik organdarǵa, Parlamentke, qoǵamdyq ınstıtýttarǵa naqty mindetter júkteldi. Sonyń aıasynda jyl sońyna deıin elimizde Ekologııalyq kodeks qabyldanady. Bul qujat ekologııaǵa qatysty basqa da zańdar sııaqty aldymen azamattyq qoǵam ókilderiniń qatysýymen talqylanyp, pysyqtalady. Osy aptada Senat erekshe qorǵalatyn tabıǵı aýmaqtarǵa qatysty zań qabyldady. Bul qujat paıdalanylmaı bos jatqan jerlerdi Ile-Alataýy tabıǵı parki men Býrabaı ulttyq parkiniń quramyna qaıtarýǵa múmkindik beredi. Jalpy aldaǵy bes jylda Memleket basshysynyń tapsyrmasy boıynsha elimizdegi orman alqaptarynda 2 mıllıard, eldimekenderde 15 mıllıon aǵash otyrǵyzý josparlanyp otyr", dedi Máýlen Áshimbaev.
Osy rette ol búgingi aksııany Prezıdent bastamasynyń alǵashqy nátıjesi retinde qarastyrýǵa bolatynyn aıtyp ótti.
"Osyndaı kógaldandyrý jumystarynyń bereri mol. "World clean up day" sııaqty aksııalardyń búkil álem úshin mańyzy zor. Qazirgi tańda ekologııalyq másele búkil álemdi alańdatyp otyr. Jer betinde kóptegen tabıǵı oryndar, ormandar men ózen-kólder adamdardyń salǵyrttyǵynan zardap shegýde. Bul dabyl qaǵarlyq jaıt ekenin atqym keledi. Bizdiń elimizde de osy salada másele az emes. Sondyqtan bárimiz judyryqtaı jumylyp, osyndaı ıgi bastamalarǵa belsendi túrde atsalysýymyz kerek", – dedi ol.
Aıta keteıik, jyl saıyn 19 qyrkúıek kúni búkil álemde "World cleanup Day" aksııasy ótedi. Mıllıondaǵan adam qoǵamdyq oryndardy qoqystan tazartý úshin senbilikke shyǵady. Byltyr aksııa 169 eldiń azamattaryn biriktirdi. Bıyl atalǵan aksııa Qazaqstanda Ekologııa, geologııa jáne tabıǵı resýrstar mınıstrliginiń uıymdastyrýymen ótip jatyr. Elordada ótken senbilikke birqatar Senat jáne Májilis depýtaty, Ekologııa, geologııa jáne tabıǵı resýrstar mınıstri Maǵzum Myrzaǵalıev, Nur-Sultan qalasynyń ákimi Altaı Kólginov, qoǵam qaıratkerleri jáne volonterler qatysty.
Atalǵan aksııa búgin elimizdiń barlyq óńirinde ótedi. Eriktiler, belsendiler, qoǵam ókilderi tabıǵı aýmaqtardy qoqystan tazartyp, aǵash otyrǵyzady. Qatysýshylarǵa qajetti jabdyqtar beriledi.
