«Qazaqstan Respýblıkasynyń keıbir zańnamalyq aktilerine jańartylatyn energııa kózderin paıdalanýdy qoldaý jáne elektr energetıkasy máseleleri boıynsha ózgerister men tolyqtyrýlar engizý týraly» zań jobasynda jańa manevrlik qýattardy salý úshin jaǵdaılar jasaý kózdeledi.
Sondaı-aq, tasqyndyq elektr energııasyn ortalyqtandyrylǵan satyp alý-satý tetigin endirý, jańartylatyn energııa kózderin qoldaýǵa ótpeli tarıf belgileý men qarjy-esep aıyrysý ortalyǵynyń JEK obektilerinen elektr energııasyn satyp alý merzimin ulǵaıtýdy qarastyrady. Osyǵan baılanysty, zań jobasynda «Elektr energetıkasy týraly» jáne «Jańartylatyn energııa kózderin paıdalanýdy qoldaý týraly» Qazaqstan Respýblıkasynyń Zańdaryna ózgerister men tolyqtyrýlar engizý kózdelgen. Depýtattar - jumys tobynyń músheleri qujatty talqylaý barysynda «Elektr energetıkasy týraly» zańnyń uǵymdyq apparatyna birqatar tolyqtyrýlar engizdi.
Al, zań jobasynyń jekelegen normalaryn jetildirý maqsatynda jumys toby generasııanyń manevrlik rejımi bar generasııalaıtyn qondyrǵylardy salý jónindegi jobalardy iske asyrý tetigine;
-tasqyndyq elektr energııasyn berý kezinde energııa óndirýshi uıymdardy elektr energııasyn berýge arnalǵan kórsetiletin qyzmetterge aqy tóleýden bosatýǵa;
-aldaǵy jylǵa elektr qýatynyń júktemeni kóterýge ázirligin qamtamasyz etý boıynsha kórsetiletin qyzmetke, baǵany tómendetýge qýat naryǵynda qalyptasqan qarajatty baǵyttaýǵa qatysty normalardy qabyldady.
Sonymen qatar, Palata búgingi otyrysta «Keme qatynasy týraly kelisimdi ratıfıkasııalaý týraly» zań jobasyn maquldady. Bul kelisim Eýrazııalyq ekonomıkalyq odaqqa múshe memleketterdiń ishki sý joldarymen kemelerdiń júzýi kezinde týyndaıtyn qatynastardy retteý boıynsha biryńǵaı quqyqtyq alań qurýǵa baǵyttalǵan.
Kelisimde Eýrazııalyq ekonomıkalyq odaqqa múshe memleketterdiń ishki sý joldarymen kemelerdiń tranzıttik ótýine ońaılatylǵan ruqsat berý tártibin jáne eki jaqty tasymaldar kezinde habarlama jasaý tártibin engizý usynylady. Sonymen qatar, Kelisimde Taraptardyń Taraptar kemeleri úshin porttardyń kórsetiletin qyzmetterine qol jetkizýdiń teń jaǵdaıyn usynýy, kemeler ekıpajy músheleriniń jeke basyn kýálandyratyn qujattardy ózara taný, sondaı-aq keme qujattaryn jáne teńizshilerdiń biliktilik qujattaryn taný kózdelip otyr.
Jalpy otyrysta Palatanyń beıindi komıtetteri «Qazaqstan Respýblıkasynyń keıbir zańnamalyq aktilerine zııatkerlik menshik salasyndaǵy zańnamany jetildirý máseleleri boıynsha ózgerister men tolyqtyrýlar engizý týraly» jáne Qazaqstan men Qyrǵyz Respýblıkasy arasyndaǵy kóshi-qon salasyndaǵy yntymaqtastyq týraly kelisimdi ratıfıkasııalaý týraly zań jobalaryn jumysqa aldy. Otyrys sońynda Májilis depýtattary A.Qońyrov, A. Jamalov, B. Dúısenbınov Sh.О́temisov, N.Álimjanov, F. Qarataev memlekettik organdar basshylaryna depýtattyq saýaldar joldady.
