Prezıdent Qasym-Jomart Toqaev Qazaqstan halqyna Joldaýynda Úkimetke Ulttyq bankpen birlese otyryp, aǵymdaǵy jyldyń sońyna deıin zeınetaqy jınaqtarynyń bir bóligin salymshylardyń paıdalanýy men olardy derbes basqarý tetigin engizý jónindegi barlyq qajetti normatıvtik-quqyqtyq aktilerdi qabyldaý jáne daıyndyq jumystaryn júrgizýdi tapsyrǵan bolatyn.
Senattyń Qarjy jáne bıýdjet komıtetiniń tóraǵasy Olga Perepechınanyń aıtýynsha, bul másele ásirese pandemııadan ótip, el ekonomıkasy baıaýlaǵan kezde asa mańyzdy ári ótkir bolyp otyr.
Depýtattar bul jańalyqtar otandyq ekonomıkaǵa, onyń ishinde ınflıasııaǵa qalaı áser etetini, zeınetaqy jınaqtaryn maqsatsyz paıdalaný nemese shetelge áketý qaýpi qandaı ekendigine de nazar aýdardy. Zeınetaqy jınaqtarynyń bir bóligin turǵyn úı jaǵdaılaryn jaqsartýǵa, emdelýge aqy tóleýge, jeke basqarýshy kompanııalarǵa berýge arnalǵan sharttarǵa qatysty kóptegen suraqtar qoıyldy. Depýtattardy azamattardy zeınetaqymen qamtamasyz etý jónindegi kepildikterdi saqtaý máselesine jáne osy saladaǵy halyqaralyq tájirıbe erekshe qyzyqtyrǵany belgili boldy.
"Meniń oıymsha, bizdiń azamattarymyzdyń zeınetaqy jınaqtarynyń bir bóligin paıdalaný máselelerindegi saýattylyǵyn arttyrý – mańyzdy másele. Azamattarymyz alaıaqtyq shemalarǵa tartylyp ketpesi úshin biz qazir zeınetaqy aktıvterin senimgerlik basqarýǵa berýdi qaraıtyn bolamyz. Sondyqtan bul másele muqııat pysyqtalýy kerek. Bizdiń azamattar ózderiniń jınaqtaryn kimge beretinin jáne onyń bolashaqtaǵy qaýpi qandaı ekenin túsinýi tıis", dedi depýtat Nurlan Qylyshbaev.
Zeınetaqy jınaqtarynyń bir bóligin salymshylardyń óz betinshe paıdalanýy nemese jeke qarjy kompanııalarynyń basqarýyna berý tetiginiń zańnamalyq bazasyn ázirleýge qatysqan memlekettik organdardyń ókilderi salymshylardyń óz zeınetaqy jınaqtaryn paıdalana alatyn sharttar men maqsattaryn egjeı-tegjeıli sıpattap berdi.
Zeınetaqy jınaqtarynyń bir bóligin salymshylardyń paıdalaný tetikterin ázirleýshiler ázirlengen tásilder turǵyn úı máselelerin sheshýge jáne azamattardyń densaýlyǵyn jaqsartýǵa, formaldy jumyspen qamtýdy yntalandyrýǵa, medısınalyq qymbat qyzmetterdiń jekelegen túrlerine qoljetimdilikti qamtamasyz etýge, halyqtyń senimi men jınaqtaýshy zeınetaqy júıesiniń tartymdylyǵyn arttyrýǵa yqpal etedi dep sanaıdy.
Talqylaý nátıjesinde kezdesýge qatysýshylar azamattarǵa qyzmet kórsetýdiń qoljetimdiligi men jedeldigin arttyrý jóninde ýákiletti memlekettik organdarǵa usynymdar ázirledi. Sondaı-aq, zeınetaqy júıesi sýbektileri arasynda barynsha qaǵazsyz qujat aınalymyn, qyzmetterdi sıfrlandyrýdy, derektermen elektrondyq almasýdy qamtamasyz etý boıynsha jumysty jalǵastyrý usynyldy. Odan basqa, usynymdar ýákiletti ınstıtýttardy aıqyndaýǵa jáne zeınetaqy jınaqtaryn jeke qarjy kompanııalarynyń basqarýyna berý tetiginiń keıbir sharttary men talaptaryn jumsartýǵa qaraı qaıta qaraýǵa qatysty boldy.
Otyrysqa ýákiletti memlekettik organdardyń, Qazaqstan qarjygerleri qaýymdastyǵynyń jáne BJZQ ókilderi qatysty.
