«Egemen Qazaqstan» gazetiniń 14 qazandaǵy sanynda jaryq kórgen «Syrdaǵy daıarlyq saıabyrlap qalǵandaı...» atty maqalada Qyzylorda oblysyndaǵy volonterlerdiń pandemııa kezinde jumyla atqarǵan jumystary joǵary baǵalanypty. Rasynda sol syndarly kezeńnen irgemiz bútin, berekemiz bekem kúıde shyǵýǵa volonterler kóp eńbek sińirdi. Syr eliniń azamattary óz kólikterimen naýqastanǵandarǵa dári-dármek, ottegi ballonyn tasyp, avtovolonterlikti qalyptastyryp, ıgilikti istiń izashary boldy. Kóligi bar jigitter ózderi habarlasyp, «qandaı kómek kerek?» dep surap, bir qoldyń salasyndaı bolyp uıymdasyp jumys istegende olardyń kózinen shyn janashyrlyqty baıqadyq. Dárihanalardan keregin taba almaǵan aǵaıyndy demeýden de tys qalmady. Kúlli oblys turǵyndaryn basy artyq dárilerdi bir ortalyqqa jınastyrýǵa shaqyrdy. Sóıtip jınalǵan dáriniń tizimin áleýmettik jelilerge jarııalap, muqtajdarǵa jetkizip berdi. Bul volonterler atqarǵan jumystardyń teńizge tamǵan tamshydaıy ǵana.
Alaıda maqalada keıingi ýaqytta volonterlerdi baǵyttap otyrýdy umyt qaldyrǵandaı dep maqala avtorynyń jergilikti bılikti synaı jazǵan tusyna tómendegideı mysaldardy keltirer edik.
Taǵy da hakim Abaıǵa júginsek, «Qareket qyl, paıdasy kópke tısin» deıdi. Maqalada kórsetilgen «Jańarǵan Jańaqorǵan jastary» volonterler tobynyń, qazalylyq jastardyń bastamalaryn ilip áketip, basqa aýdandarda da aıasyn keńeıtý úshin jumystar jasalýda.
Volonter jyly aıasynda Qyzylorda oblysynda óńirlik front-ofıs pen «Syr Volonterlary» ortalyǵy quryldy. Eriktiler shtaby 14 jalǵyzbasty qart pen tyl ardageriniń úı sharýashylyǵyna, qala aýmaǵyndaǵy meshitterdiń tazalyq jumystaryna qolǵabys tıgizdi. UBT-ǵa daıyndalǵan túlekterge matematıkadan senbi saıyn 5 ret tegin kýrs, keıin onlaın kýrstar uıymdastyryldy. Zańgerlik keńeske muqtajdarǵa Ádilet departamentiniń mamandary jáne erikti zańgerler tegin konsýltasııa berdi.
«Donor bol» aksııasy qan kerek bolǵan naýqastardyń aıaǵynan tik turýyna, «Dalateks» JShS basshysy D.Abyzov uıymdastyrǵan turǵyndarǵa 7 myń maska taratý bastamasy pandemııanyń bas kezindegi qorǵanysh quralynyń tapshylyǵyn joıýǵa oń áser etti.
Kásipkerlerdiń az qamtamasyz etilgen otbasylarǵa azyq-túlik taratý isine jumylýy, bir ǵana Maǵjan Eralıevtiń 300 otbasyna qamqorlyq kórsetýi, kórshi oblystaǵy maqtaaraldyq aǵaıynnyń basyna túsken qıyndyqqa beıjaı qaramaýy Syr boıyndaǵy volonterliktiń ózindik arnasy qalyptasqanyn kórsetse kerek. Maqtaaralǵa attanǵan 10 avtokólikten turatyn qaıyrymdylyq kerýenin jasaqtaýǵa 30 bastamashy top, 180 volonter eseli eńbek sińirdi. Aınalasy az ýaqytta 15 tonnadan astam azyq-túlik, kıim-keshek, qural-jabdyq jınalyp, jóneltildi.
«Qyzylorda volonterleri» qoǵamdyq qorynyń dırektory Olga Chebakova pandemııa órship turǵan kezde qala turǵyndaryna, kásipkerlerge túsindirme jumystaryn júrgizdi. Aqparattyq paraqshalar taratyp, qoǵamdyq tártiptiń oryndalýyn qadaǵalady. Volonterlerdi biriktirip, turaqty túngi reıdter, qoǵamdyq baqylaý uıymdastyrdy.
Árıne Syr boıyndaǵy volonterler qozǵalysynyń atqarǵan jumystaryn bir maqalada túgel qamtý múmkin emes. Kózimiz jetken bir aqıqat – aýyzbirlik, janashyrlyq, janyńdaǵy adamdy jat kórmeıtin baýyrmaldyq qasıetter joıylmaǵan eken. Solardyń eń negizgilerin mysalǵa keltirsek, jyl basynan beri volonterler 8451 muqtaj otbasyna áleýmettik kómek kórsetýge atsalysty. Az qamtylǵan 4870 otbasynyń balalaryna oqý quraldary tabystaldy. Qurban aıt merekesinde «Aqmeshit-Syrdarııa» meshiti úılestirgen Qyzylorda qalasyndaǵy 3830, aýdandardaǵy 3431 otbasyna qaıyrymdylyq kómek úlestirý sharasyna da volonterler járdemdesti. «Hıkmet» qaıyrymdylyq qory demeýshilik jasaǵan 1000 otbasyna azyq-túlik taratý isine mesenattar, meshit qyzmetkerleri, avtovolonterler jumyldy. Pandemııamen kúreste alǵy shepte júrgen medısına qyzmetkerlerin jan-jaqty qoldaý úshin «Myń alǵys» aksııasy uıymdastyrylyp, 255 medısına qyzmetkeriniń otbasyna azyq-túlik jetkizildi. Aýrýhanalarda adam amandyǵy úshin úzilissiz arpalysqan 1700 medqyzmetker ystyq tamaqpen qamtamasyz etildi, 72 ottegi ballony tasymaldandy. Aksııaǵa 88 volonter, 25 avtovolonter qatysty.
Bul málimetterdi ne úshin keltirip otyrmyz?
Jurtshylyq juqpaly indetke qaramastan eldiń qamy, halyqtyń densaýlyǵy úshin kúresken volonterlerdiń ıgi isterge bir kisideı jumylǵanyn bilýi kerek. Volonterler úılestirgen sharýalardyń arqasynda qanshama ıgilikti istiń atqarylǵanyna ýaqyt tóreshilik jasaıtyny anyq. Naǵyz azamattardyń, azamattyq qoǵam belsendileriniń, Syr volonterleriniń eńbegi laıyqty baǵalanatynyn kún alda dep oılaımyz.
«Syr Volonterlary» ortalyǵy
Qyzylorda oblysy
