Forým Halyqaralyq Túrki akademııasy Qazaqstan Respýblıkasynyń IýNESKO jáne ISESKO isteri jónindegi Ulttyq Komıssııasy men IýNESKO jónindegi Iran Ulttyq Komıssııasynyń qoldaýymen onlaın rejimde ótip jatyr.
Jıynda sóz alǵan Memlekettik hatshy Qyrymbek Kósherbaev bıyl táýelsiz Qazaqstan úshin erekshe tarıhı jyl ekenin aıta kele jahandyq pandemııa jaǵdaıy men álemdik ekonomıkalyq daǵdarysqa qaramastan adamzat tarıhynda óshpes iz qaldyrǵan uly tulǵalar Abaıdyń 175 jyldyǵyn, uly oıshyl, fılosof Ábý-Nasyr ál-Farabıdiń 1150 jyldyǵyn, uly qonys Altyn ordanyń 750 jyldyǵy men bıyl táýelsiz elder dostastyǵynyń mádenı astanasy mártebesine ıe bolǵan Shymkent qalasynyń 2200 jyldyǵyn atap ótýge qoldaý kórsetken barlyq halyqaralyq uıymdar men sheteldik áriptesterge rızashylyǵyn bildirdi.
"Bul jobalar bizdiń uly tulǵalar aldyndaǵy qaryzymyz, óskeleń urpaq aldyndaǵy paryzymyz dep bilemiz. Sonyń ishinde bıylǵy mereıtoı jylynda bizdiń jerlesimiz ál-Farabıdiń murasyn, onyń álemdik órkenıettegi ornyn aıqyndaý, ál-Farabıdi ulttyq brend retinde ilgeriletý boıynsha birshama jumystar atqaryldy. Jyl boıy ál-Farabıdiń qoǵamdaǵy ǵylymnyń róli, izgilik, etıkalyq kemeldik týraly ıdeıalaryna negizdele otyryp, halyqaralyq, respýblıkalyq jáne óńirlik deńgeılerde qoǵamdyq saıası áleýmettik ekonomıkalyq, salalyq, kásibı keshendi is-sharalar júzege asyryldy. Atap óter jaıt Farabı babamyzdyń parasatty ǵumyry búgingideı jahandaný zamanynda jas urpaqty básekege qabiletti etip ósirý jolynda úlken úlgi, ónege", - dedi Q.Kósherbaev.
Jıynǵa Qazaqstan Respýblıkasynyń Memlekettik hatshysy Qyrymbek Kósherbaev, Iran Islam Respýblıkasynyń Ǵylym, zertteýler jáne tehnologııa mınıstri Mansýr Golamı, Qazaqstannyń Bilim jáne ǵylym mınıstri Ashat Aımaǵambetov, Qazaqstannyń Mádenıet jáne sport mınıstri Aqtoty Raıymqulova, ISESKO Bas hatshysy Salım Ál-Malık, Islam Yntymaqtastyǵy uıymy janyndaǵy ǵylym-tehnologııa jónindegi turaqty komıtettiń (COMSTECH) dırektory Muhammed Ikbal Chaýdarı, Túrkııa Respýblıkasy Prezıdentiniń Bas keńesshisi Iаlchyn Topchý, jáne taǵy basqa irgeli halyqaralyq uıymdardyń jetekshileri, Ulttyq komıssııalardyń basshylary, qoǵam jáne memleket qaıratkerleri, rektorlar, Ǵylym akademııalarynyń jetekshileri, dıplomattar, belgili farabıtanýshy ǵalymdar qatysyp jatyr.
Aıta keteıik, forým álemniń alty tilinde ilespe aýdarmamen aýdarylyp, áleýmettik jeliler arqyly tikeleı kórsetilýde.
