Sýretti túsirgen – Jumabaı Musabek
Bes kún boıy Taldyqorǵan qalasy teatr óneriniń halyqaralyq ortalyǵyna aınalyp, kórermender otandyq jáne sheteldik teatrlardyń úzdik qoıylymdaryn tamashalaý múmkindigine ıe boldy. Festıval aıasynda elimizdiń jetekshi teatrlarymen qatar Grýzııa, Túrkııa jáne О́zbekstannan kelgen shyǵarmashylyq ujymdar óz ónerlerin ortaǵa salyp, kórermenniń ystyq yqylasyna bólendi. Túrkııanyń táýelsiz «Painted Bird» teatrynyń jetekshisi Jale Karabekır qýanyshyn jasyra almady.
«Biken Fest» festıvaline qatysý biz úshin úlken mártebe. О́ner áleminde ózindik qoltańbasyn qaldyrǵan Bıken Rımova syndy tulǵanyń qurmetine arnalǵan festıvalden shaqyrtý alý erekshe qýanysh syılady. Uıymdastyrý deńgeıi óte joǵary. Ártúrli baǵyttaǵy qoıylymdardy tamashalap, kóptegen shyǵarmashylyq tájirıbe jınadyq. Bizdi shaqyrǵan uıymdastyrýshylarǵa shynaıy alǵysymyzdy bildiremiz», dedi ol.
Atalǵan festıval tek ónerdi básekelestik alańyna emes, shyǵarmashylyq dıalog pen mádenı baılanysty nyǵaıtýdyń quralyna aınaldyrdy. Sondyqtan munda jeńimpaz ben jeńilgen joq. Barlyq qatysýshy teatr ujymdary joǵary kásibı sheberligi men sahnalyq izdenisteri úshin arnaıy dıplomdarmen marapattaldy.
«Qazaq kórermeni bizdi erekshe jyly qarsy aldy. Halyqtyń qonaqjaılyǵy men mádenıetke degen qurmetin sezindik. Bul sapar umytylmas áser qaldyrdy. Bolashaqta Qazaqstanǵa taǵy da kelýdi qalaımyz», dedi túrkııalyq teatr ártisi Pelın Orých.
Festıval barysynda ár eldiń teatr mektepteri men sahnalyq dástúrleri toǵysyp, tájirıbe almasýǵa múmkindik týdy. Bul óz kezeginde teatr óneriniń damýyna tyń serpin berip, shyǵarmashylyq izdenisterdiń kókjıegin keńeıtedi. Sonymen qatar qazaq teatr ónerin halyqaralyq deńgeıde tanytýǵa jáne ulttyq mádenı qundylyqtardy dáripteýge negiz boldy. Bıken Rımova syndy sahna sańlaǵynyń esimin ulyqtaý arqyly jas urpaqqa ónerdiń qadir-qasıeti nasıhattaldy.
Qazaqstannyń eńbek sińirgen qaıratkeri, akter Kendebaı Temirbaıuly mundaı jobalardyń halyqaralyq mádenı baılanystardy damytýdaǵy róli erekshe ekenin atap ótti.
«Bul festıvaldiń jyl saıyn ótkizilýi onyń mazmuny qaıtalanady degen sóz emes. Ár jyly jańa teatrlar kelip, jańa shyǵarmashylyq izdenister men tyń ıdeıalar usynylady. Mundaı mádenı jobalar halyqtardy jaqyndastyryp, memleketter arasyndaǵy dostyq pen mádenı baılanysty nyǵaıtady. Bul – álemniń ár qıyrynan kelgen óner maıtalmandarynyń basyn qosatyn úlken rýhanı alań. Ásirese jastardyń teatr ónerine qyzyǵýshylyǵynyń artýyna yqpal etetini qýantady. Qazaqstan teatr óneriniń abyzy Asanáli Áshimovtiń bastamasymen dúnıege kelgen «Biken Fest» búginde halyqaralyq teatr keńistiginde ózindik orny bar bedeldi festıvalge aınaldy», dedi ol.
Festıvaldiń jabylý rásimi de erekshe áserli ótti. Kesh barysynda «Ulytaý» etnorok toby, ánshi Maqsat Rahmet, «Qaraqat» mektep-stýdııasynyń «Jetigenshiler» ansambli men Danesh Raqyshev atyndaǵy oblystyq fılarmonııanyń «Jetisý» bı ansambli óner kórsetip, kórermenderge kóterińki kóńil kúı syılady.
Osylaısha, IV Halyqaralyq «Biken Fest» teatr festıvali qorytyndylandy. Alaıda onyń sahna tórinde bastalǵan shyǵarmashylyq baılanystary men rýhanı áseri aldaǵy ýaqytta da jalǵasyn tabary sózsiz.
Jetisý oblysy
