Osy jobalardy júzege asyrý úshin el janashyrlary, oblystyq máslıhattaǵy Nur Otan partııasynyń fraksııa ókilderi men ózge de azamattar qoldaý kórsetýde. Mysaly, Túlkibas aýdanynda kásipker Beıbit Týleshev atalǵan jobalar aıasynda ortalyq aýrýhanaǵa 2 jasandy tynys alý apparatyn tartý etti. Sondaı-aq kásipker alma baýynyń bir kúndik terilgen almasyn aýrýhana dárigerlerine jáne em qabyldap jatqan naýqastarǵa taratty. Jomart jan indettiń ekinshi tolqynyna daıyndyq jumystary týraly estip, daıyndyq jumystaryna óz úlesin qosýdy nıet etkenin aıtady. Aıta ketelik, aýdan ákimdiginiń uıymdastyrýymen pandemııanyń qıyn shaǵynda túlkibastyq eriktiler ottegi kosentratorynyń 42 danasyn, 360 dana arnaıy medısınalyq qorǵanysh kıimin, 210 dana ottegi balonyn, 5 dana avtomattandyrylǵan kir jýý mashınasyn, 22 pýlsoksımetr jáne bólme-palatalardy zalalsyzdandyrýǵa qajetti kvars lampalaryn tapsyrǵan. Sondaı-aq aýdan eriktileri qaýyrt kezde medısına salasynyń qyzmetkerlerine túski as úlestirý isin uıymdastyrdy.
Al Nur Otan partııasy Túrkistan oblystyq fılıaly jýyrda «О́mir» jáne «Shıpa» jobalary aıasynda aýrýhanalarǵa 31 jasandy tynys alý apparatyn jáne 200 muqtaj otbasyna dári-dármek qorapshalaryn jiberdi. Buǵan deıin de «О́mir» jobasy boıynsha aýrýhanalarǵa 21 apparat, al «Shıpa» arqyly 400 otbasyna dári-dármek tapsyrylǵan bolatyn. Iаǵnı partııanyń úılestirýimen tapsyrylǵan jasandy tynys alý apparattarynyń sany 52-ge jetip otyr.
Elimizde koronavırýs indeti sharyqtap, el qınalǵan sátte partııa tarapynan «Biz birgemiz» aksııasy sheńberinde oblysta 43 myńnan astam otbasyna azyq-túlik berilse, 34 055 otbasyna 50 myń teńgeden berildi. Taıaýda taǵy 4 852 otbasyna 50 myń teńgeden beriledi dep josparlanyp otyr.
– Oblystyq máslıhat depýtattary, partııa músheleri jáne ózge de kásipkerlerdiń kómegimen «О́mir» jobasy boıynsha 52 jasandy tynys alý apparaty satyp alyndy. Sonymen birge «Shıpa» jobasy arqyly az qamtylǵan 600 otbasy dári-dármekpen qamtyldy. El azamattaryna, kásipkerlerge, Jas Otan jastar qanaty men Jas Turkistan eriktiler klýbyna alǵysymyz mol, – deıdi Nur Otan partııasy Túrkistan oblystyq fılıaly tóraǵasynyń birinshi orynbasary Beısen Tájibaev.
Jalpy, qaıyrymdylyq jobalaryna atsalysqan kásipkerler men depýtattar qataryndaǵy Nuraly Ábishov, Maǵaýııa Turysbekov, Almas Salımov, Qaınar Abasov jáne Jańabaı Aǵabekov bastaǵan bir top azamat elge kómektesýge árqashan daıyn ekendikterin aıtady.
Aıta ketelik, jobany Jas Otan jastar qanaty jáne oblystyq «Jastar resýrstyq ortalyǵy» janynan qurylǵan Jas Turkistan eriktiler qozǵalysy úılestirýde.
Túrkistan oblysy
