Komıssııa otyrysynda sybaılas jemqorlyqqa qarsy is-qımyl salasyndaǵy zańnamalyq jańashyldyqtar tanystyrylyp, Agenttiktiń Túrkistan oblysy boıynsha Departamentimen aǵymdaǵy jyldyń 9 aıynda 9 mekemede júrgizilgen sybaılas jemqorlyq táýekelderine syrtqy taldaýdyń nátıjeleri ortaǵa salyndy. Alqaly jıynda óńir basshysy О́mirzaq Estaıuly zańmen bekitilgen ózgeristerdiń mańyzdylyǵyn alǵa tartyp, ashyqtyq prınsıpi arqyly halyqqa qolaıly qyzmet kórsetýge aıryqsha basymdyq berý qajettigin jetkizdi. «О́zine senimdi adam ǵana eshnárse jasyrmaıdy. Durysty – durys, burysty – burys deý úshin aqıqat pen ashyqtyq qajet. Túrkistan óńirine qatysty jaǵymsyz, jalpy túsinikten arylýymyz kerek. Kerisinshe, biz elimiz boıynsha jemqorlyqpen udaıy kúresip, ony anyqtap, aldyn alýdan aldyńǵy qatardamyz. Jemqorlyqpen pármendi kúres nátıjeli. Bul baǵyttaǵy jumys kúsheıedi. Qylmystyń ashylýyna ymyrasyzdyq pen ashyqtyq áser etedi», dedi О́mirzaq Shókeev.
Al Departament basshysynyń birinshi orynbasary Mıras Qarǵabaı 9 aı ishinde júrgizilgen ishinara taldaýdyń nátıjesinde memlekettik organdardyń qyzmetinde normatıvtik quqyqtyq aktiler men uıymdastyrýshylyq-basqarýshylyq qyzmettegi birqatar sybaılas jemqorlyq táýekelderi, atap aıtsaq muqtajdar esebinde turatyn azamattarǵa turǵynjaı berýde kezektilikti saqtamaý, memlekettik ataýly áleýmettik kómekti taǵaıyndaý barysynda týyndaıtyny anyqtalyp, soǵan sáıkes táýekelderdi joıý maqsatynda Departamentpen joldanǵan 73 usynystyń 58-i oryndalǵanyn atap ótti.
Sondaı-aq, jıynda «Túrkistan – adaldyq alańy» jobalyq keńsesiniń aıasynda oblysqa qarasty ákimdikterdiń jańa jumys úlgisine kóshýi negizinde óńir turǵyndary memlekettik qyzmetterdi sapaly, jedel jáne kedergisiz alýyna múmkindik beretin «servıstik ákimdikterdiń» ashylý máselesi talqylandy. Búgingi kúni jańa úlgidegi ákimdik Túrkistan, Kentaý qalalary men Sozaq, Tólebı, Túlkibas, Keles aýdandarynda ashylǵan, osyǵan sáıkes komıssııa otyrysynda oblys ákimi tarapynan barlyq qala, aýdandardaǵy ákimdikterdiń jyl sońyna deıin «Servıstik ákimdik» úlgisine kóshýi boıynsha naqty tapsyrmalar berildi.
Komıssııa otyrysynda sóz alǵan Túrkistan oblysynyń bastyǵy Qaırat Dálbekov ishki ister salasyndaǵy sybaılas jemqorlyqqa qarsy is-qımyl máseleleri boıynsha atqarylǵan jumystardy baıandap, quqyqbuzýshylyqtyń aldyn alý, boldyrmaý jáne jolyn kesýde «Turaqty arnaıy mobıldi top» tosynnan tekserý jumystaryn kúsheıtkenin jáne búgingi kúni qosymsha tálimgerler keńesi, ofıserlik jáne áıelder keńesi jumys istep jatqanyn jetkizdi.
Jıyn sońynda óńirde jemqorlyq deńgeıin tómendetý boıynsha birqatar usynystar tyńdalyp, qoǵam indetimen kúres sharalary barlyq memlekettik organ basshysynyń qyzmetinde basym baǵyttardyń biri bolýy qajet ekendigi eskertildi.
Túrkistan oblysy
