Zaǵıp jáne nashar kóretin azamattarǵa arnalǵan respýblıkalyq kitaphanaǵa arnaıy kelgen AQSh Bas Konsýldyǵynyń baspasóz, bilim jáne mádenıet jónindegi keńesshisi Anand Krıshna osy sharaǵa Qazaqstandaǵy AQSh dıplomatııalyq mıssııasynyń ókili retinde qatysyp otyrǵanyna rızashylyǵyn bildirip, «Biz múmkindigi shekteýli jandardyń bilim berý resýrstary men ınfraqurylymǵa teńdeı qol jetkizýine qajetti negizgi quqyqtar men múmkindikterdi árdaıym qoldaımyz. Osy baǵytta qoljetimdi orta men ınklıýzıvti bilim berýdi nasıhattaýshy azamattyq uıymdarmen tyǵyz jumys jasap kelemiz. Bul joba biz qarjylandyratyn kóptegen jobalardyń biri retinde AQSh elshiliginiń shaǵyn granttar baǵdarlamasy aıasynda júzege asty. Osydan 30 jyl buryn azamattyq uıymdar men belsendi azamattardyń arqasynda Amerıka múgedektigi bar amerıkalyqtar týraly zańdy qabyldaýǵa sheshim qabyldady. Eger de osyndaı úkimettik emes uıymdardyń eńbegi bolmaǵanda, biz oǵan qol jetkize almas edik. "Áleýmettik-ınnovasııalyq jáne tehnologııany damytý ortalyǵy" sııaqty uıymdardyń jumysy mańyzdy. Sondyqtan múmkindigi shekteýli adamdarǵa teń múmkindikter berýge baǵyttalǵan jobalardy qýana qoldaımyz», – dep atap ótti.
Búginde resmı derekter elimizde erekshe qajettilikke zárý balalar sanynyń 144 783 ekenin rastaıdy. Onyń 96 555 mektep jasyndaǵylar bolsa, 48 228-in mektep jasyna deıingi balalar quraıdy. Zaǵıp jáne nashar kóretin azamattarǵa arnalǵan respýblıkalyq kitaphana dırektory Ashat Baıuzaqovtyń aıtýynsha, búginde álem boıynsha zaǵıp jandardyń júz myń adamǵa shaqqandaǵy toqsan paıyzy Braıl qarpinde oqı almaıdy. Olardyń aýdıo kitaptardy tyńdaý múmkindigi ǵana bar. Sebebi, núkteli-bederli kitaptar jetkiliksiz. Sondyqtan da "Zere ájeıdiń áńgimeleri" kitaptar serııasymen berilgen qazaq ertegileriniń núkteli-bederli qarippen jaryq kórýi kitaphana oqyrmandary úshin úlken jańalyq bolyp otyr. Núkteli-bederli kitaptardy shyǵarý máselesi Parlamentte de kóterilip Úkimetke depýtattyq saýal joldanǵanyn atap ótken A.Baıuzaqov
"Áleýmettik-ınnovasııalyq jáne tehnologııany damytý ortalyǵy" qoǵamdyq birlestigimen ary qaraı osy baǵytta birlesken jumystardy jolǵa qoıý máselesine toqtalyp, jobaǵa qoldaý kórsetken AQSh elshiligine alǵys bildirdi.
"Áleýmettik-ınnovasııalyq jáne tehnologııany damytý ortalyǵy" qoǵamdyq birlestiginiń ókili Nýrııa Lıtvınova 2015 jyldan bergi aralyqta josparlanyp, 2018 jyly qolǵa alynǵan jobany júzege asyrýdyń ońaıǵa túspegenin jetkizdi. Balalardyń qyzyǵýshylyǵyn týǵyzatyn ertegilerdi núkteli-bederli qarippen berý tehnologııasynyń ózi birqatar qıyndyqtar týǵyzǵan. Jobanyń mańyzdylyǵyna toqtalǵan Nýrııa Lıtvınova búginde mamandandyrylǵan bilim berý ortalyqtaryndaǵy oqý-ádistemelik quraldarynyń jetkiliksizdigin atap ótti.
Onyń aıtýynsha, "Erekshe balalar úshin erekshe kitaptar" jobasy aıasynda shyqqan kitaptar mamandandyrylǵan mekemelerdiń mektepke deıingi jáne tómengi synyptaryna kómekshi ádisnamalyq ınnovasııalyq qural retinde ázirlendi. Bes bólimnen turatyn kitaptar serııasynyń avtory "Áleýmettik-ınnovasııalyq jáne tehnologııany damytý ortalyǵy" QR Basqarma tóraıymy Sáýle Ýrazbaeva.
"Zere ájeıdiń áńgimeleri" kitaptar serııasy balalarǵa ertegiler álemin tanýǵa múmkindik beredi. Áńgimelerdiń mazmuny túrki halyqtarynyń ejelgi folkloryna negizdelgen. Túrkilerdiń ǵalam, ata-babalardyń adamgershilik baǵdarlary, ejelgi uǵymdarynyń qazynasy Zere ájeniń ǵajaıyp ertegileri arqyly qazaqtardyń ejelgi fılosofııalyq álemine jol tartady. Áńgime mádenı qundylyqtardyń nasıhatshysy retinde áje áńgimesiniń arqaýyna negizdelgen. Mátinder balaǵa túsinikti tilde berilgen. Psıhologııanyń zamanaýı ádisin – ertegi terapııasy arqyly berý jobanyń utymdy tusy deýge negiz bar. Ertegiler – ulttyq qundylyqtardy jas urpaqqa jetkizýdiń eń kóne quraly.
Núkteli-bederli mátin men avtorlyq ıllıýstrasııalardy 3D pishimde basyp shyǵarýdyń ınnovasııalyq ádisinde balalar ómirine qaýipsiz materıaldar men boıaýlar qoldanylǵan. Zamanýı tehnologııa kitaptardyń qoldanys merzimin bes nemese odan da kóp jylǵa uzartýǵa múmkindik beredi.
Joba uıymdastyrýshylary kórý qabileti nashar jáne múlde kórmeıtin balalardyń álemdi tanýda kóptegen qıyndyqtarǵa tap bolatyndyǵyna da erekshe nazar aýdaryp otyr. Zaǵıp balalar kórneki zattar men qubylystardyń tabıǵı bolmysyn týra qabyldaı almaıdy. Bul balalardyń damý erekshelikterine de keri áserin tıgizedi. Sondyqtan da balalardyń saýsaq ushymen áripterdi tanyp qana qoımaı, 3D sýrettermen bezendirilgen kórkem shyǵarmanyń mazmunyn áserlenip oqýyna múmkindik beredi. Bul óz kezeginde muqtaj oqyrmandardyń zııatkerlik qabiletin arttyra túsetini sózsiz.
Kitaptardy daıyndaý kezinde Braıl shrıftin oqytýdy jeńildetýge arnalǵan ádister de qoldanylǵan. Iаǵnı, ertegilerdiń, sondaı-aq áńgimelerdiń kásibı aýdıo jazbasy engizilip otyr. Dybystar qorshaǵan ortadaǵy qubylystardy tanýdy, tabıǵat erekshelikteri týraly tolyq túsinik qalyptastyrýǵa yqpal etedi. Ertegilerdiń aýdıo nusqasynda berilgen tabıǵat dybystary balalardyń qııalyn ushqyrlaıdy. Qııaldaý arqyly bala qabiletin shyńdaıdy ári ózin-ózi tanýyndaǵy erekshe qadamdar bolmaq. Kitaptaǵy sýretterden shynaıylyqty, meıirimdilik pen ańǵaldyqty ańǵarýǵa bolady. Ádemi, kórkem sýretter ertegiler álemin sol qalpynda elestetýge kómektesedi.
Uıymdastyrýshylar "Erekshe balalar úshin erekshe kitaptar" jobasy aıasynda shyqqan kitaptardyń qoǵamǵa paıdaly ekenin ári qoldaýǵa muqtaj balalar úshin erekshe syı ekendigin atap ótti. Balalar qoǵamnyń jarqyn keleshegi. Sondyqtan da olar óz elinde baqytty balalyq shaqty, sapaly bilim alý múmkindigin, otbasyndaǵy úılesimdi ortany sezinip ósýi qajet.
ALMATY
