Jetisý jurtshylyǵyna «Ertegishi áje» atanyp ketken Jumabala apamyz – halyq ertegilerin nasıhattaýǵa ózindik úlesin qosyp kele jatqan zııaly jan. Bıyl Almaty oblysynyń ákimi Amandyq Batalovtyń qoldaýymen jas oqyrmanǵa jol tartqan sáýleli kitap avtordyń kópten kókeıde júrgen bir tilegi edi. Jas jetkinshekterdiń júregine jol tabar bul týyndynyń ǵumyry uzaq bolary sózsiz.
J.Balaqaranova jańa kitabynda halyq ertegileriniń eń bir shuraılysyn, mazmuny men máni tereńin tańdap alypty. Kóp izdenis, tereń talǵammen baspa betin qaıta kórgen qazaq ertegileriniń tańdamalysy dep atalǵan kitapty aıshyqtaýǵa negiz bar.
Máselen, tyń týyndyǵa engen bir ǵana «Súleımen patsha men baıǵyz» atty ertegini qaıta bir eske alaıyqshy: áıeliniń aıtqanyn eki etpeıtin Súleımen patsha zaıybynyń ótinishimen qus súıeginen álemde joq saraı salyp bermekshi bolyp, qus bitkendi dárgeıine keltiredi emes pe? Sonda baıǵyz ǵana shaqyrtýǵa qulaq aspaýshy edi ǵoı. Arnaıy shaqyrtqanda baryp patsha quzyryna jetken baıǵyz kelmeý sebebim kóp oılanǵanym, dúnıede az ben kóptiń parqyna jetýge sana jeteletkenim dep jaýap berip, erden áıeldiń kóp ekenin bilgenin, óıtkeni áıeliniń sózine ergen erlerdi jaýlyqtylar sanatyna qosqanyn aıtady. Sonda zaıybynyń sózine erip, qus bitkenge zalalyn tıgize jazdaǵan Súleımen táýbesine keledi. Mine, osyndaı mazmundy da ǵıbratty ertegiler J.Balaqaranovanyń «Ertegiler álemi» kitabyna toptastyrylǵan.
Kitap avtory 2000 jyly «Jazýshy» baspasynan jaryq kórgen 6 tomdyq «Qazaq ertegileri», 1992 jyly «Dáýir» bapasynan oqyrmanǵa jol tartqan «Álem ertegileri», 1983 jyly «Jazýshy» baspasynan shyqqan «Kazahskıe narodnye skazkı» kitaptarynan ertegilerdi suryptap, eń ǵajap degenderin óziniń kitabyna jınaqtapty. Atalǵan kitapta, 260-tan astam qazaq jáne álem ertegileri toptastyrylǵan.
Endeshe, jas oqyrmandardyń oljasyna aınalar osynaý kitap «Ertegishi ájeniń» rýhanııatqa qosqan ózindik úlesi ekenin aıshyqtap ótýge negiz bar. Adam ómiriniń nurly shaǵy – balalyqtyń baǵdarshamy bolar týyndynyń oqyrmany kóp bolýyn tileımiz!
