Bul týraly Almaty TA-nyń Akimat Live baǵdarlamasynyń tikeleı efıri barysynda belgili boldy. Qala ákimi B.Saǵyntaev KVI pandemııasy kezinde naýqastardy josparly qabyldaýdyń qysqarýyna baılanysty profılaktıkalyq medısınalyq tekserýdi úıde ótkizý jóninde sheshim qabyldanǵanyn habarlady.
Almaty ákimi profılaktıkalyq medısınalyq tekserý aýrýdyń túrin erte anyqtaýǵa baǵyttalǵan halyqqa belsendi medısınalyq kómek kórsetý tetikteriniń biri ekenin atap ótti. Sondyqtan qarttar men balalardy úıde profılaktıkalyq medısınalyq tekserýden ótkizý týraly sheshim qabyldandy.
Emhanalarda arnaıy qurylǵan ári quramyna pedıatorlar, nevropatologtar, hırýrgtar, LOR-dárigerler men oftalmologtar engen mýltıdıssıplınarlyq toptardaǵy medısına qyzmetkerleri 2 qarashadan bastap jumystaryn bastaıdy. Jalpy praktıkanyń ýchaskelik dárigerleri tizim jasaıdy jáne medısınalyq tekserýdiń ýaqyty týraly, úıde ári tekserýge daıyn bolýyńyz jóninde aldyn ala habarlaıtyn bolady.
65 jáne odan úlken jastaǵy 80 myńǵa jýyq qala turǵyndaryn, sonymen qatar 100 myńǵa jýyq balalardy (0-16 jas aralyǵyndaǵy), onyń ishinde áleýmettik jáne medısınalyq uıymdarda esepte turǵan múmkindigi shekteýli balalardy, kópbalaly otbasylardyń jáne áleýmettik jaǵynan qorǵalatyn otbasylardyń balalaryn jáne qashyqtan oqıtyn balalardy qamtý josparlanǵan.
B.Saǵyntaev bul sharanyń qala turǵyndarynyń densaýlyǵyn saqtaýǵa jáne koronavırýstyq ınfeksııanyń jańa tolqyny saldarynan qosymsha qaýipke ushyrmaýlaryna kómektesetinine senim bildirdi.
Megapolıs basshysy qaladaǵy epıdemııalyq ahýaldyń kún saıyn qubylyp otyrǵanyn eske saldy. Onyń ústine aýrýdyń ósý tendensııasy baıqalady. Eger qyrkúıektiń sońynda - qazan aıynyń basynda aýrýdyń maksımaldy tómendeýi baıqalyp, táýligine 3-5 oqıǵa tirkelse, al qazannyń úshinshi aptasynda táýligine 44 oqıǵaǵa deıin tirkeldi, ıaǵnı ósim 9 eseden artyq.
Sondyqtan B.Saǵyntaev qala turǵyndaryn sanıtarlyq-epıdemııalyq qaýipsizdik sharalaryn qatań saqtaýǵa taǵy da shaqyrdy. Olar: medısınalyq maskany kııý, áleýmettik qashyqtyqty jáne sanıtarlyq gıgıenany saqtaý. Adamdar kóp shoǵyrlanǵan jerlerden aýlaq bolyp, shetelderge sapar shegýden bas tartqan jón.
