Saltanatty rásimge Iran úkimeti tarapynan Prezıdenttiń keńesshisi, IIR muraǵat jáne ulttyq kitaphana uıymynyń basshysy Áshráf Borýdjerdı qatysty.
Á.Borýdjerdı Iran aqyny Ferdoýsıdiń óz shyǵarmashylyǵy arqyly ulttyń tili men rýhyna jan bitirgenin, sol sııaqty Abaıdyń óz halqyna ólsheýsiz eńbek sińirgenin tarqatyp aıtty. Á.Borýdjerdı qazaq jáne parsy oıshyldaryn qos el halyqtaryna jaqyn tanystyryp, ekijaqty mádenı yqpaldastyqty arttyrýdy quptaıtynyn málimdedi.
Elshi Ashat Orazbaı rásimde sóılegen sózinde Abaıdyń fılosof, aqyn, ustaz, ulttyq jańa ádebıettiń negizin qalaýshy, kompozıtor retinde jarqyn muralar qaldyrǵanyn egjeı-tegjeıli baıandady. Bul oıshyldyń óz halqyn bilim-ǵylym izdeýge, qoǵamdy órkendetýge shaqyrǵan tarıhı róline, eńbekteriniń ádebı, fılosofııalyq turǵydan qundylyǵyna keńinen toqtaldy.
Qazaqstan elshisi bıyl QR Prezıdenti Qasym-Jomart Toqaevtyń bastamasymen Qazaqstanda jáne shet elderde qazaqtyń uly aqyny Abaı Qunanbaıulynyń 175 jyldyq mereıtoıy, Shyǵystyń kórnekti fılosofy ál-Farabıdiń 1150 jyldyq mereıtoıy merekelenip jatqanyn, osy oraıda Qazaqstan men Iran kóptegen halyqaralyq is-sharalardy birlesip ótkizip kele jatqanyn atap ótti.
Saltanatty rásim barysynda taraptar QR jáne IIR arasyndaǵy mádenı baılanystardy, eki eldiń ulttyq kitaphanalary arasyndaǵy qatynastardy ekijaqty jáne kópjaqty yntymaqtastyq aıasynda odan ári órkendetýge ázir ekenderin bildirdi.
Elshi Prezıdentiniń keńesshisi Á.Borýdjerdıge parsy tiline aýdarylǵan qazaqstandyq taqyryptaǵy kitaptardy, sonyń ishinde Abaı qara sózderi men óleńderin jáne ózge de materıaldardy tabystady.
