Bıyl tórtinshi ret ótkizilip otyrǵan dástúrli parlamenttik syılyqtyń qorytyndysy jaz mezgilinde Buqaralyq aqparat quraldary qyzmetkerleriniń kásibı merekesi qarsańynda shyǵarylǵan bolatyn. Alaıda karantınge baılanysty estelik músinsheler men laýreattardyń dıplomdaryn tapsyrý rásimi kúzgi parlamenttik sessııaǵa aýystyrylǵan-dy.
Májilis Tóraǵasy «Parlament sózi» syılyǵyn jeńimpazdarǵa tabystap, buqaralyq aqparat quraldarynyń elimizdiń damýyndaǵy, sondaı-aq depýtattyq korpýs pen jýrnalısterdiń birlesken nátıjeli jumysyn atap ótti. Nurlan Nyǵmatýlınniń aıtýynsha, jýrnalısterdiń Májilis jumysyn nasıhattap, depýtattardyń qyzmetin halyqqa jetkizýde qosyp jatqan úlesteri óte zor.
«Parlamenttik jýrnalıstıkany damytýǵa qosqan úlesi úshin» atalymy boıynsha syılyq «Qazaqstan dauiri» bas dırektory Sáýle Meshitbaeva men «Karavan» gazetiniń bas redaktory Igor Shahnovıchke berildi.
«Úzdik televızııalyq sıýjet úshin» atalymyn «Habar» telearnasynyń tilshisi Indıra Jylqaıdarova men «Eýrazııa» birinshi arnasynyń» tilshisi Svetlana Penkova ıelendi.
«Úzdik baspa jarııalanymy úshin» atalymyn «Egemen Qazaqstan» gazetiniń tilshisi Temir Qusaıyn men «Lıter» gazetiniń ujymy jeńip aldy.
«Úzdik ınternet jáne radıo materıaly» atalymyn «Abai.kz» aqparattyq portaly jáne Serik Sabekov («Kazinform») ıelendi. «Parlament sózi» syılyǵynyń «Arnaıy reportaj» atalymyn «Qazaq radıolarynan» Qymbat Dosjan jáne «Habar 24» telearnasynyń korrespondenti Mark Brıýshko aldy.
«Úzdik beıne-sýret materıaly úshin» atalymyn «Nur Media» fototilshisi Sovetbek Maǵzýmov jáne «Habar» telearnasynyń bas operatory Edil Ermekbaev ıelendi.
Sondaı-aq bıyl áleýmettik jelidegi úzdikter anyqtaldy. Olar «Áleýmettik jelidegi úzdik materıal úshin» atalymyn alǵash ret jýrnalıst-bloger О́rken Kenjebek jáne YEDILOV ONLINE Telegram-kanalynyń avtory Erbol Edilov ıelendi.
Sonymen qatar Májilis Tóraǵasy Nurlan Nyǵmatýlınniń bastamasymen bıylǵy jyly «Parlament sózi» arnaıy syılyǵy» atalymy halqymyzǵa belgili jýrnalıst, tanymal telejúrgizýshi, ardaqty azamat, mezgilsiz dúnıeden ótken Beısen Quranbektiń qurmetine berilip, arnaıy syılyq jaryna tabystaldy.
Jeńimpazdarǵa Májilis músinshelerimen jáne arnaıy dıplomdar tabystaldy.
