Ýnıversıtettegi E.Sháımerdenov atyndaǵy aýdıtorııada ótken konferensııany jýrnalıstıka fakýltetiniń dekany Saǵatbek Medeýbekuly júrgizdi. Búginde júzdegen shákirt tárbıelegen ulaǵatty ustazdyń mereıtoıy budan buryn Astanada atalyp ótken bolsa, ózi uzaq jyldar eńbek etken tól shańyraǵynda atalýynyń mańyzy erekshe.
Osy oraıda alǵashqy sózdi "Alashqa ortaq toıǵa Amerıka, Ulybrıtanııa, Túrkııa, Qyrǵyzstan, О́zbekstan, Túrkimenstan, taǵy basqa da elderden kóptegen ǵalymdar jınalýy tıis edi" dep bastaǵan QazUÝ birinshi prorektory Muqash Búrkitbaev ǵalym IýNESKO janyndaǵy buqaralyq kommýnıkasııa jáne jýrnalıstıka boıynsha dúnıejúzilik ORBICOM uıymynyń múshesi Namazaly Omashuly esiminiń álemge tanymal ekendigin erekshe nazarǵa alyp ótti. Ǵıbratty ustazdyń ǵylymdaǵy jolyn qazaq radıosynda eńbek etken jyldarymen baılanystyra kele Muqash Myrzabaıuly "N.Omashuly ýnıversıtette ǵalymǵa bet buryp, assısenttikten professorlyqqa, kafedra meńgerýshiliginen prorektorlyq qyzmetke deıin bıiktedi. Búginde júzdegen shákirtteriniń aldy qoǵam jáne memleket qaıratkerleri, aıtýly qalamgerler, jýrnalıster bolyp eseli eńbek etip keledi. Ǵalymnyń qazaq radıosynyń 1912 jyldan bastalatyn tarıhyn naqty aıǵaqtarmen dáleldep shyǵýy, kóptegen ǵylymı maqalalary men monografııalary, sondaı-aq Alash tarıhnamasyn júıelep berýi zamannyń sózin sóılegen qaıratker-jýrnalıst, ushqyr oıly pýblısıstiń ańǵarympaz ustaz ekendigin kórsetedi" dep atap ótti. Namazaly Omashulynyń qaıratkerliginiń taǵy bir kórinisi jýrnalıstıka mamandyǵy boıynsha dıssertasııalyq keńes ashyp, talaı talanttardyń jolyn ashýymen tyǵyz baılanysty. Al halyqaralyq baılanystardy jolǵa qoıýy ǵalym eńbeginiń taǵy bir qyry ispetti.
Qazaqstan Jazýshylar odaǵy tóraǵasynyń orynbasary, fılologııa ǵylymynyń doktory, professor Baýyrjan Jaqyp "Qazaq jýrnalıstıkasy tarıhyn, teorııasyn, tájrıbesin zerttegen ǵalymdar týraly sóz qozǵaǵanda óz ǵylymı mektebi bar sanaýly tulǵalar qatarynda Qazaqstan joǵary mektep akademııasynyń akademıgi, fılologııa ǵylymynyń doktory, professor, Qazaqstannyń eńbek sińirgen qaıratkeri, "Qurmet" ordeniniń ıgeri N.Omashulynyń esimi aldymen aýyzǵa iligedi" dep atap ótti. Baıandamasyn qara shańyraqta ótken stýdenttik jyldardyń estelikterimen jalǵaǵan B.Jaqyp ustazben alǵash tanystyqtan keıingi qyryq jyl ishindegi estelikterdi, ustazdyń shákirtterine degen ákelik qamqorlyǵy men eńbekke baýlýdaǵy tájirbıelerine toqtala kele, mundaı janashyrlyq pen qamqorlyq eshqashan umytylmaıdy", - dedi ol.
1992 jyly respýblıkada tuńǵysh ret jýrnalıstıka mamandyǵy boıynsha kandıdattyq dıssertasııa qorǵaıtyn dıssertasııalyq keńes ashyldy. Buryn Máskeýde ǵana qorǵalatyndyqtan, ol jyldarda ǵylymı dárejesi bar ǵalymdar az edi. Tóraǵasy N.Omashuly bolyp tabylatyn osy keńestiń ashylýynyń arqasynda 70-ke tarta kandıdat shyqty. Búginde osy ǵalymdar Astana, Qaraǵandy, Semeı, Qyzylorda, Túrkistan, Qostanaıda jýrnalıst mamandardy tárbıeleýge atsalysyp júr. Al QazUÝ jýrnalıstka fakýltetindegi oqytýshylardyń basym kópshiligi sol kezde dıssertasııa qorǵaǵandar. Bul tutas ǵylymı mektep dep aıtýǵa negiz bar. Stýdentterdiń kúshimen daıyndalatyn respýblıkalyq "Sana" radıo-telejýrnalynyń jaryqqa shyǵýy bolashaq jýrnalıster úshin esten ketpeıtin is" dep atap ótti B.Jaqyp. Ustaz N.Omashulynyń halyqaralyq baılanystardy jolǵa qoıa otyryp, Amerıka, Fransııa, Kanada, Túrkııa, Ońtústik Koreıa, Fılıpınniń jýrnalıstik mektepterimen alǵash qarym-qatynatardy jolǵa qoıýdaǵy tájirıbesi, zertteýshilik-ǵalymdyq joly da baıandamashynyń nazarynan tys qalmady. Osy oraıda B.Jaqyp ǵalymnyń qalamynan týǵan "Tolqyndaǵy totııayn", "Qazaq radıojýrnalıstıkasy", "Belester", "Jol ústinde jýrnalıst" sııaqty zertteý kitaptaryna, "Alash kósemsózi" on tomdyǵy men "Egemen Qazaqstan" gazetiniń tarıhynan syr shertetin úsh tomdyǵyna, basqa da hrestomatııalyq eńbekteri men monografııalaryn erekshe atap ótti. Ǵalymnyń eki júzden astam ǵylymı maqalalary qazaq jýrnalıstıkasynyń tarıhy men teorııasy haqynda sóz qozǵaıdy. Ásirese, radıojýrnalıstıka salasyn tereń zerttegendiginiń nátıjesinde ǵylymı aınalymǵa kóptegen tyń derekter men tujyrymdar endi. Máselen, qazaq radıojýrnalıstıkasy damýynyń tarıhı kezeńderi, janrlary, pishimderi, baǵdarlamalary naqtylandy. Jekelegen habarlarǵa baıypty baǵa berildi. Radıodaǵy ádebıet máseleleri, satıra jáne ıýmor týraly salıqaly oılar qorytty.
N.Omashuly jaıyndaǵy júrekjardy pikirin ortaǵa salǵan tarıh ǵylymdarynyń doktory, professor Saǵymbaı Qozybaev ǵalymnyń shákirt atanyp, oqýǵa túsken kezderine qatysty esteliktermen bólisip, mereıli mereke ıesine quttyqtaý tilegin bildirdi.
Odan keıin sóz alǵan «Qazaq eli» jýrnalynyń redaksııalyq keńes tóraǵasy jəne jaýapty shyǵarýshy redaktory Túrkıe Ertolqyn Gaıreıýllah, Mımar Sınan kórkem óner ýnıversıtetiniń professory Əbdiýaqap Qara, Kolýmbııa ýnıversıtetiniń professory Gúlnar Kendirbaı, Halyqaralyq aqparattyq tehnologııalar ýnıversıteti, Medıakommýnıkasııa jəne Qazaqstan tarıhy kafedrasynyń professory Aıazbı Beısenqulov, t.b. basqa da ǵalymdar N.Omashevtyń ǵylymdaǵy jetisterimen qatar búgingi jýrnalıstıka salasyndaǵy ózekti máseleler tóńireginde oı órbitti.
Konferensııa barysynda Namazaly Omashuly osy jıyndy uıymdastyryp otyrǵan ál-Farabı atyndaǵy QazUÝ jáne L.Gýmılev atyndaǵy Eýrazııa ulttyq ýnıversıteti basshylyǵyna, shákirtterine alǵysyn bildirdi. "Jýrnalıstıka mamandyǵyn tańdaýda qatelespedim. Osy joldaǵy eńbek jolymdy tek maqtanyshpen ǵana eske alamyn" degen ustaz eńbek jolynyń azdy-kópti baǵalanyp jatqandyǵyna rızashylyǵyn bildirdi. Kıeli shańyraqtyń búgingi tynys-tirshiligi, damýy, aýdıtorııalardyń zamanaýı jaraqtalýyna qatysty oılaryn ortaǵa sala otyryp, qazaqtyń kóptegen mańdaıaldy tulǵalaryn tárbıelegen bilim ordasynda áli de talaı mártebesi joǵary mamandar tárbıelenip shyǵatyndyǵyna zor senim bildirdi. Osy oraıda ǵalymnyń jubaıy Klara Hamzaqyzy da óz oılaryn ortaǵa salyp, rahmetin aıtty.
Jetpiske tolǵan mereıli ustazǵa ál-Farabı atyndaǵy QazUÝ "Eren eńbegi úshin" medali tabys etilip, shapan jabyldy. Sonymen birge ýnıversıtettiń qoldaýymen jaryqqa shyqqan "О́negeli ómir" serııasy aıasynda Namazaly Omashulyna arnalǵan kitaptyń tusaýskeseri ótip, ǵalym eńbekteriniń arnaıy kórmesi, foto-kórme uıymdastyryldy.
