О́ziniń Instagram-daǵy paraqshasynda B. Saǵyntaev balalardyń bos ýaqyttaryn salaýatty jáne paıdaly ótkizýlerin uıymdastyrý ákimdik jumysyndaǵy negizgi basymdyqtardyń biri ekenin atap ótti.
«Naýryzbaı aýdanyn aralaǵan kezde mesenattardyń qoldaýymen ashylǵan «Social Music Center» men «Jas Tolqyn» ónerdi damytý ortalyqtarynda boldym. Munda balalar mýzykalyq aspaptarda oınaýǵa, vokal men qolónerge tegin úıretiledi. Sportpen shuǵyldanýǵa «Alty Alash Fight club» seksııasy ashylǵan», - dep jazdy Almaty ákimi.
Ol sonymen qatar «Bıýdjetke qatysý» jobasy boıynsha aýdanda belsendi jastarǵa arnalǵan ashyq aspan astyndaǵy keshen salynǵanyn, onyń ishinde basketbol alańy, rollerrodrom men vorkaýt aımaǵy bar ekenin aıtty. Kishkentaı baldyrǵandar «Jumyspen qamtýdyń jol kartasy» aıasynda salynǵan jańa skverlerdegi oıyn alańdarynda kóńilderin kóterýde.
«Biz Jańa Almaty aýdandarynda turatyn kishkentaı turǵyndarymyz úshin sport pen mádenı-demalys ortalyqtarynyń qoljetimdi bolýyna mán berýdemiz», - dep atap ótti qala ákimi.
Onyń aıtýynsha, kelesi jyly Naýryzbaı men Alataý aýdandarynda Oqýshylar saraıynyń qurylysyn bastaý josparlanýda. Bıyl Jetisý aýdanynda úsh, al Alataý, Medeý men Túrksib aýdandarynda bir-bir dene shynyqtyrý-saýyqtyrý kesheniniń qurylysy bastalady. Alataý aýdanynda 14 kortqa arnalǵan tennıs ortalyǵy salynýda. Jalpy barlyq aýdandarda ondaǵan jańa sporttyq demalys oryndary ashyldy. Kelesi jyly qala turǵyndarynyń suranysy boıynsha bul jumystar jalǵasyn tabady.
