Qostanaı qalasyndaǵy «Dostyq úıinde» ótken dóńgelek ústel májilisiniń túıini osy oıǵa kelip tireldi. «Zamandar kóshedi, kórshiler qalady». Keńqoltyq qazekeń kórshi haqysyna jiti qaraǵan. «Aǵaıynnyń aty ozǵansha, aýyldastyń taıy ozsyn», degen ǵoı. Kórshilikke, jaqsy kóńilge shekaranyń qyzyl syzyǵy da kedergi emes.
Qostanaı qalasyndaǵy «Dostyq úıinde» ótken dóńgelek ústel májilisiniń túıini osy oıǵa kelip tireldi. «Zamandar kóshedi, kórshiler qalady». Keńqoltyq qazekeń kórshi haqysyna jiti qaraǵan. «Aǵaıynnyń aty ozǵansha, aýyldastyń taıy ozsyn», degen ǵoı. Kórshilikke, jaqsy kóńilge shekaranyń qyzyl syzyǵy da kedergi emes.
Reseıdiń irgeles Qorǵan, Chelıabi oblystary Qostanaımen qashannan aralasyp-quralasyp jatady. Talaı zamannyń jeli qatar jatqan orys pen qazaqtyń basynan birdeı ótti. Shekaranyń irgesinde bolǵandyqtan, Reseıdiń osy eki oblysynda da qazaqtar az emes. Al Qostanaıda orysyń tolyp júr.
Bul joly Qostanaıǵa Zaýrale halyqtary Assambleıasy keńesiniń tóraǵasy Vladımır Ýfımsev Qorǵan oblysynyń delegasııasyn bastap keldi, al Chelıabiden oblystyq «Chelıabınskıı rabochıı» gazeti redaktorynyń orynbasary, halyqtar dostyǵy taqyrybyna qalam siltep júrgen jýrnalıst Lev Lýzın kelip qatysty. Qorǵan delegasııasynyń quramynda qandasymyz, Qorǵan oblysy qazaqtarynyń ulttyq-mádenı avtonomııasy tóraǵasynyń orynbasary Jaqsylyq Shaıkenov te bar.
Dóńgelek ústelge qatysqan reseılik qonaqtar men oblystaǵy etnomádenı birlestikterdiń ókilderi, jýrnalıster «Reseı men Qazaqstannyń shekaralas oblystarynyń aqparattyq yntymaqtastyǵy» degen taqyryp tóńireginde oılaryn ortaǵa saldy.
– Qorǵan men Qostanaıdyń irgesi ajyrap kórgen emes. Keńes Odaǵynan buryn, Keńes Odaǵy kezinde, odan keıin árqaısymyz óz aldymyzǵa táýelsiz el bolǵanda da qos halyqtyń kórshilik kóńiline qaıaý túspedi. О́ıtkeni, qatar jatqan eki oblystyń turǵyndary týys, aǵaıyn. Bireýdiń inisi Qorǵanda tursa, aǵasy Qostanaıdy jaılap otyr. Bul – ómir, oǵan eshqandaı saıasattyń qatysy joq. Qorǵanda 20 ulttyq-mádenı avtonomııa bar. Solardyń arasyndaǵy belsendisi de – qazaqtar, – dedi Zaýrale halyqtary Assambleıasy keńesiniń tóraǵasy Vladımır Ýfımsev.
Qazaqstanda halyq Assambleıasy 1995 jyly quryldy. Eldiń ekonomıkasy turalaǵan qıyn jyldar edi. Elbasy Nursultan Nazarbaev birlik bolsa, tirlik bolatynyn oılady. Reseıde halyqtar Assambleıasy 2000 jyly quryldy. Chelıabilik áriptesimiz Lev Lýzın Qostanaıdaǵy Dostyq úıine qyzyǵa qaraıtynyn jasyrmady. Qorǵan men Qostanaı oblysynyń saıası-ekonomıkalyq baılanystary berik. Jyl saıyn eki oblysta jastar festıvali kezek ótedi. Osy májiliste fılosofııa ǵylymdarynyń kandıdaty Qalqaman Jaqyp geografııalyq turǵydan máńgi kórshi, ekonomıkalyq turǵydan máńgi áriptes, qorǵanys jaǵynan máńgi odaqtas reseıliktermen túrli sharalardy álde de qolǵa alýǵa bolatynyn aıtty.
Qazir Qazaqstanda týrızm endi damýǵa bet alyp keledi. Muny eki jaqtyń da jastary, oqýshylary arasynda qolǵa alǵan durys. Eki jaqtyń stýdentterin arheologııalyq, tarıhı zertteý jumystarynda yntymaqtastyrýǵa bolady, – degen ǵalymnyń usynysy kópke unady. Qostanaı oblysyndaǵy kishi assambleıa janyndaǵy saraptamalyq toptyń múshesi, tarıh ǵylymdarynyń doktory Erkin Ábil, eńbek ardageri О́mirzaq Ihtılıapov halyqtar dostyǵyna syna qaqqysy keletinderdiń tabylatyndyǵyn, kórshi eki halyqty, eki eldi jaman nıetterden saqtaý úshin barlyq jaǵdaıdy jasaý kerektigin tilge tıek etti.
Dostyq taqyryby jibek jipteı sýdyrap órilgen májiliske qorǵandyqtar qurqol kelmepti. Vladımır Ýfımsev «Kostanaıskıe novostı» gazetiniń redaktory Sergeı Harchenko men oblysqa belgili sharýashylyq uıymdastyrýshy, kásipker О́mirzaq Ihtılıapovke Zaýrale halyqtary Assambleıasynyń «Altyn medalin» tabys etti. Sergeı Vasılevıch – Qostanaıdaǵy, Qorǵandaǵy halyqtar dostyǵyna dáneker bolyp júrgen tulǵalardyń biri. Al О́mirzaq Bekdildauly Qorǵandaǵy musylman meshitin, pravoslavıe shirkeýin salýǵa, sondaǵy qazaq dıasporasy aqsaqalynyń qajylyqqa barýyna, Qostanaı oblystyq gazetterin sondaǵy aǵaıyndarǵa jazdyryp berýge demeýshilik kórsetken edi.
– Bizdiń halyqtar ómirlik tájirıbe mektebinen ótken. Ashtyq, qýǵyn-súrgin, soǵys, odan qaldy tyń kóterý – osynyń barlyǵy da dostyqsyz, birliksiz ómir bolmaıtynyn kórsetken edi. Reseıliktermen ishken sýymyz, jutqan aýamyz bir. Toleranttylyq demeı-aq, bir-birimizge qurmetpen, syılastyqpen qarasaq, baǵalasaq, mine, bárimizge ortaq baılyq osy. Al búgingi májilis – naǵyz halyqtyq dıplomatııa boldy, – dep májiliste bir aýyz sóz alǵan qostanaılyq professor Vladımır Gershýnniń lebizi osy kezdesýdiń ádil baǵasyndaı edi.
Názıra JÁRIMBETOVA,
«Egemen Qazaqstan».
QOSTANAI.
