Jetisý ólkesinde qos teatrdyń shymyldyǵynyń ashylýy ónerge sýsaǵan jurtshylyqty bir serpiltip tastaǵany anyq. Munymen qosa jyl sońyna qaraı halyq teatrlarynyń qatary taǵy kóbeıetindigi jaıyndaǵy jańalyq oblys halqy úshin úlken syı bolyp otyr.
О́tken ǵasyrdyń toqsanynshy jyldarynyń sońyn ala jabylyp qalǵan «Narynqol» halyq teatry «Hantáńiri» teatry bolyp qaıta ashylyp, Bıken Rımova atyndaǵy Taldyqorǵan drama teatrynda aqıyq aqyn Muqaǵalı Maqataevtyń «Aqqýlar uıyqtaǵanda» poetıkalyq-sazdy dramasymen alǵashqy qoıylymyn bastady. Qoıylymda Qarasazdan túlep ushqan qos aqyn Muqaǵalı men Erkin Ibitanov beıneleri qaıta qaýyshty. Al Uıǵyr aýdanyndaǵy «Qaradala» halyq teatrynyń tusaýy A.Qunanbaıuly poemasynyń jelisimen sahnalanǵan «Eskendir» qoıylymymen kesildi.
Osy eki teatr isiniń jandanyp, kórermenimen qaýyshýyna muryndyq bolǵan Qazaqstannyń eńbek sińirgen qaıratkeri – Asqar Naımantaev. Balalyq shaǵy osy teatrdyń tarıhymen baılanysty aıtýly ónerpazdyń ákesi Ábdiǵalym Naımantaev «Narynqol» halyq teatrynda rejısser bolyp eńbek etse, anasy Rafııa Raıjanova sol halyq teatrynyń ártisi bolyp qyzmet atqarǵan.
«Hantáńiri» teatry bolyp qurylǵan óner ordasy shymyldyǵynyń «Aqqýlar uıyqtaǵanda» shyǵarmasymen ashylýy ári Muqaǵalı Maqataev pen Erkin Ibitanov esimimen baılanysty bolýy kezdeısoqtyq emes. Sonaý elýinshi jyldardyń sońynda Shalkóde aýylynda muǵalim bolyp turǵanynda Muqaǵalı aǵamyz ben Lashyn Muratqyzy kórkemónerpazdar úıirmesinde Qyz Jibek pen Tólegendi oınasa, Erkin aǵamyz aýdan ortalyǵynda 1957 jyly kórkemónerpazdar úıirmesin ashqanyn áli kúnge aýdan jurtshylyǵy umyta qoıǵan joq. Osylaısha, aýdandyq teatr 1960 jyly qurylyp, 1963 jyly halyq teatry ataǵyn alǵan.
«Basshysy, quramy, sahnaǵa qyzmet jasaý mamandary kásibı mamandardan quralsa kásibı teatr bolyp shyǵady. Álem teatrlarynyń tarıhy boıynsha barlyq teatr eń áýeli halyq teatry bolyp ashylǵany belgili. Men eki teatrdyń ashylýyna kómek jasadym. Endigi kezekte teatrǵa eki aýdan ózderi ıe, ózderi basshy. Qyzmetke alatyn da ózderi. Ári qaraı qolymnan kelgenshe kómegimdi aıamaımyn. Bastaǵan isti tastamaımyn da. Buǵan deıin oblysta ashylǵan teatrlardyń árqaısysynda onnan astam shtaty bar. Sondyqtan da jańa ashylǵan teatrlardyń aldynda úlken josparlar tur. Jastardyń da talaby erekshe qýantady. Kórgen dúnıesinen qorytyndy shyǵaryp, bastamalardy qoldap ketýge daıar-aq tur» degen Asqar Naımantaev «Hantáńiri» men «Qaradala» halyq teatrlary ashyldy degen sátten «teatrǵa alyńyzshy» degen ótinishterdiń kóp bolǵandyǵyn aıtady. Olardyń qatarynda qolynan is tigý keletin sheberler de, zergerler de bar. Jumysqa suranǵan jastardyń ótinishi kóbeıgendigine qýanyshyn jasyrmaǵan A.Naımantaev aǵymdaǵy merekelermen qatar, keler jyly naýryzda oblystyq halyq teatrlar festıvali ótetindigin jetkizdi. A.Naımantaevtyń aıtýynsha, teatr eki adamnan qurylatyn otaý emes, úlken óndiris. Sondyqtan da Raıymbek, Uıǵyr aýdandyq ákimshilikteri de jańa jumys ornyn ashýǵa daıyn. Osy eki teatrdyń aýdan ákimdikteri men ónerge janashyr azamattardyń qoldaýynyń arqasynda ashylǵany belgili. Sol sııaqty mamandar kele qalsa, teatr emes, óner mektepterinde de jumys tabylady. Eń bastysy mádenıetke sýsaǵan óńirde óner qozǵalysy bastaldy. Endi osyny álsiretip almaı, aqyldasyp otyratyn is kóp. Eger de jastar osy qarqynmen jumys isteı bilse, aýdanda ónerdiń qanat jaıatynyna senim mol.
Almaty oblysy
