Aqtóbe oblysynda tártip saqshylary zańsyz ań aýlaý faktisi boıynsha kúdiktilerden Qyzyl kitapqa engizilgen kıiktiń 167 dana múıizin, bes kılogramm etin, ańshylyq myltyq pen 12 patrondy tárkiledi.
Qazirgi tańda polısııa qyzmetkerleri kıikterdiń múıizin satyp alý jáne olardy shet elge ótkizýmen aınalysatyn azamattardy izdestirýde. Al Qyzylorda oblysynda polıseıler qaraquıryqty atyp óltirgen brakonerdi qamaýǵa aldy. Tártip saqshylary kúdikti kóringen motosıkl júrgizýshisin tekserý maqsatynda toqtatqan. Kólik quralyn tekserý barysynda olar qaraquıryqtyń ushasyn, pyshaq pen myltyqty tapty.
Sondaı-aq Túrkistan oblysynyń aýmaǵynda “Brakoner” jedel aldyn alý is-sharasy ótkizilgen bir aıda tabıǵatty qorǵaý zańnamasy salasynda úsh ekologııalyq qylmys jáne 159 ákimshilik quqyq buzýshylyq ashyldy. Polısııa brakonerlerden 152 kılogramm zańsyz aýlanǵan balyqty, úsh qaıyqty jáne 200 metrden astam balyq aýlaý torlaryn tárkiledi.
Tabıǵatty qorǵaý polısııasynyń qyzmetkerleri Keles aýdandyq polısııa bóliminiń ýchaskelik ınspektorlarymen birge Syrdarııa ózeninde elektr toǵynyń kómegimen balyq aýlaýmen aınalysqan jergilikti turǵyndy ustady.
Eki kúnnen keıin olar “qytaı torlarymen” balyq aýlaǵan taǵy eki brakonerdi quryqtady. Barlyq faktiler boıynsha sotqa deıingi tergeý amaldary júrgizilýde.
