Is-sharaǵa Qazaqstan Respýblıkasynyń Tuńǵysh Prezıdenti – Elbasy kitaphanasynyń dırektory, Nur Otan partııasy "Tuńǵysh" BPU tóraǵasy Ámirhan Rahymjanov, qalalyq Nur Otan partııasynyń "Birlik" fılıaly tóraǵasynyń birinshi orynbasary Shyńǵyshan Qojahmetov, elordalyq 17 mektep dırektorlary qatysty.
– Elbasy kitaphanasy bilim berý men mádenı baǵyttaǵy mindetterdi júzege asyrýdyń jańa múmkindikterine qol jetkizip otyr. Mekemeniń mýzeı, arhıv, kitaphana qoryn ushtastyrǵan jańa ǵımarat qazirgi jastarǵa rýhanı, patrıottyq tárbıe berýde, qundylyqtar júıesin qalyptastyrýda mańyzdy isin jalǵastyrady. Elbasy ózi aıtqandaı: "Elińdi súıe bilseń, jan aıamaı qyzmet ete bilseń, eliń de seni alaqanǵa salyp aıalaı biledi". Sol Otan súıgishtikti tárbıeleý úshin biz barynsha múmkindikterimizdi paıdalanyp kelemiz, – dep Á.Rahymjanov qonaqtardy qarsy alyp, pandemııa kezeńinde mekeme onlaın-formatta belsendi jumys istep jatqanyn atap ótti.
Erkin áńgimelesý túrinde ótken basqosýda qatysýshylar zamanaýı bilim berý máselelerin, qazirgi jaǵdaıdaǵy qosymsha bilimniń rólin jáne yntymaqtastyqtyń múmkindikterin talqylady.
Is-shara barysynda bilim berý mekemeleriniń basshylaryna mektep kitaphanalarynyń qoryn tolyqtyrý úshin kitaptar tabys etildi. Olardyń ishinde: "Bizdiń Prezıdent", "Tuńǵysh", "Astana – táýelsiz Qazaqstannyń sımvoly", "Tarıhı tańdaý" jáne t. b. basylymdar bar. Olardyń kópshiligin Elbasy Keńsesiniń basshysy, saıası ǵylymdar doktory, professor M.B. Qasymbekov jetekshilik etetin Elbasy kitaphanasynyń avtorlyq ujymy jaryqqa shyǵarǵan.
– Elordalyq mektepter bizdiń basty seriktesterimiz boldy jáne solaı bolyp qala beredi. Osy múmkindikti paıdalana otyryp, sizderge kópjyldyq jemisti yntymaqtastyq úshin alǵysymdy bildiremin jáne jańa shyǵarmashylyq tabystar tileımin, – dedi Á.Rahymjanov.
– Elbasy kitaphanasynyń mýzeıi – tarıhqa tereń boılaıtyn oryn. Meniń oıymsha, árbir azamat óz eliniń tarıhyn bilýge mindetti. Kóptegen adam jastardy qalaı tárbıeleý kerektigin oılaıdy. Jastarǵa moral oqýdyń qajeti joq, olarǵa qalaı durys ómir súrý kerektigin kórsetý qajet. Osyndaı uly jolmen júrý: qarapaıym jumysshydan Prezıdenttikke deıin kóterilip Elbasy bolý – osyndaı ómirdiń, kúrestiń, jasampazdyqtyń jarqyn dáleli. Mundaǵy árbir fotosýret pen jádiger – bul Elbasynyń ómiri men kópqyrly qyzmetiniń tarıhy arqyly kórsetilgen, jańa táýelsiz memleketti quryp qana qoımaı, ony búkil álemge tanymal elge aınaldyrǵan Qazaqstan tarıhy. Maǵan bul jer óte unady, oqýshylarymyzdy mindetti túrde osynda ákelemin. Elbasy kitaphanasyna mektep kitaphanalarynyń kitap qoryn tolyqtyrý maqsatynda osyndaı mańyzdy ári qajetti bastamasy úshin zor alǵysymdy bildirgim keledi. Biz barlyq oqýshylardy jańa basylymdarmen tanystyrýǵa kúsh salamyz. Tek oqýshylardy ǵana emes, olardyń ata-analaryn da qundy qazynalarmen tanystaratyn bolamyz", – dep oı bólisti A.Qurmanov atyndaǵy №17 mektep-gımnazııasynyń dırektory, qalalyq máslıhattyń depýtaty Rámzııa О́mirbaeva.
