Tatar etnomádenı birlestigi uıytdastyrǵan sharany "Qoǵamdyq kelisim" KMM dırektorynyń mindetin atqarýshy Azamat Múkeev ashty.
"Táýelsizdikpen birge qurylǵan ortalyq osy jyldar ishinde eldiń ósip-órkendeýine úles qosty. Onyń belsendileri únemi jınalyp, mádenı dástúrlerdi qalpyna keltirýge qatysady jáne ata-babalarymyzdyń baı murasyn saqtaý úshin qoldan kelgenniń bárin jasaıdy. Eń bastysy, olar birlik pen beıbit ómirdiń qundylyǵyn tereń túsindi. Sondyqtan aımaqtaǵy kelisim ortalyǵyna aınalǵan Qazaqstan halqy Assambleıasyna oblystyq fılıalyna degen alǵysy sheksiz. Pandemııa kezinde de qaýymdastyq músheleri onlaın rejıminde barlyq is-sharalarǵa, merekelerge, jarystarǵa qatysyp, óz belsendilikterin kórsetti", - dedi Azamat Múkeev.
Sharada qaýymdastyq múshelerine dostyq pen kelisimdi nyǵaıtý jolynda atqarǵan jumystary úshin Qazaqstan halqy Assambleıasynyń 25 jyldyǵyna arnalǵan medaldar tabystady.
"Bizdiń kúndelikti jumysymyzdyń negizgi mazmuny qoǵamdaǵy dostyq pen kelisimdi nyǵaıtý, jalpy adamzattyq rýhanı-adamgershilik qundylyqtardy nasıhattaý, jas urpaqty patrıottyq rýhta tárbıeleý, bizdiń ortaq úıimizdiń bolashaǵy úshin joǵary jaýapkershilik", - dedi tatar etnomádenı birlestiginiń jetekshisi Galııa Gızatýllına.
Sonymen qatar oblystyq Qazaqstan halqy Assambleıasy hatshylyǵynyń meńgerýshisi Jaǵyppar Tájmahanov aımaǵymyzdyń damýyna zor úles qosqan tatar etnosynyń ókilderine alǵys hatyn tabystady.
Mádenı kún aıasynda tyl ardagerlerine Tatarstan Respýblıkasynyń Prezıdenti Rýstam Mınnıhanovtyń quttyqtaý hattary tabystaldy.
Sharada ár túrli janrdaǵy án-bı, óleńder oryndaldy. "Jasmın" bı tobynyń bıshileri soǵys ýaqytyn eske túsiretin "Kók oramal" bıin oryndady. Uly aqyn Abaı Qunanbaevtyń shyǵarmalary negizinde "Sarman" vokaldyq toby men jeke ánshiler ár túrli tilderde ánder shyrqady.
