Foto: Life.ru
DDSU birneshe elde hantavırýs juqtyrý jaǵdaılarynyń jıileýine baılanysty ahýaldy baqylaýǵa aldy. Qazirgi tańda Izraıl, Fransııa, Shveısarııa jáne Nıderlandyda qaýipti indettiń taralýy baıqalyp otyr. Máselen, Izraıl dárigerleri eldegi alǵashqy jaǵdaıdy resmı túrde rastady. Jerusalem Post basylymynyń málimetinshe, naýqas vırýsty birneshe aı buryn Shyǵys Eýropa aýmaǵynda júrgende juqtyrýy múmkin. Qazir onyń jaǵdaıy turaqty.
Eýropa elderinde de alańdaýshylyq kúsheıip otyr. Hantavırýs juqtyrǵandar Fransııa, Shveısarııa jáne Nıderlandyda tirkeldi. The Sun basylymynyń jazýynsha, Fransııa azamaty vırýs anyqtalǵan «MV Hondius» krýızdik laıneriniń jolaýshysymen bir reıste ushqan bolýy yqtımal. Sonymen qatar Nıderlandynyń KLM áýe kompanııasynyń bortserigi de indet juqtyrdy degen kúdikpen baqylaýǵa alyndy.
Kongo-Qyrym qyzbasy: Qaýipti vırýstan qalaı qorǵanýǵa bolady?
DDSU epıdemıology Marııa Van Kerkhove qazirgi jaǵdaıdy koronavırýs pandemııasymen salystyrýǵa bolmaıtynyn aıtty. Mamannyń sózinshe, hantavırýs adamdar arasynda ońaı taralmaıdy jáne juǵýy úshin óte tyǵyz baılanys qajet. Ǵalymdar bul ınfeksııanyń adamnan adamǵa berilý yqtımaldyǵyn zerttep jatqanymen, mundaı jaǵdaılardyń óte sırek kezdesetinin alǵa tartady.
Aıta keterligi, vırýstyń jasyryn kezeńi alty aptaǵa deıin sozylýy múmkin. Sondyqtan aldaǵy ýaqytta naýqastar sanynyń artýy yqtımal.
Eske sala keteıik, MV Hondius krýızdik laınerinde hantavırýs indeti tarap úsh adam qaza tapqan bolatyn. Alaıda mamandar vırýs tasymaldaýshysy sanalatyn kemirgishterdiń laıner bortynan tabylmaǵanyn málimdedi. Qazirgi tańda bortynda 150-ge jýyq adamy bar keme Kabo-Verde jaǵalaýynda tur. Laıner Ispanııanyń Tenerıfe aralyna bet alǵan. Keıbir jolaýshylar ınfeksııa týraly resmı aqparat jarııalanbaı turyp kemeden túsip ketkendikten, birneshe el olardyń júrgen jerin anyqtaýǵa kiristi. Tenerıfege jetken soń deni saý jolaýshylardy elderine qaıtarý josparlanǵan. Ispanııanyń 14 azamaty Madrıdtegi áskerı gospıtalde karantınge ornalastyrylady.
Asyljan QURMANǴALI
