Foto: Depositphotos. com
Aıta keteıik, ushqyshsyz júıelerdi paıdalanýdaǵy negizgi maqsat – jerdegi jaǵdaı týraly aqparatty naqty ýaqyt rejıminde jedel alý jáne qamtamasyz etý, túrli mindetterdi tıimdi oryndaýdy arttyrý. Mundaı isterdiń qataryna ártúrli júkterdi jetkizý, jaralanǵandardy izdeý jáne evakýasııalaý, sondaı-aq tabıǵı jáne tehnogendik sıpattaǵy tótenshe jaǵdaılardyń saldaryn joıý sharalaryna qatysý jatady.
Qarýly Kúshterdiń Bas shtabynyń Ushqyshsyz avıasııalyq júıeler jáne robototehnıka keshenderi departamenti bastyǵynyń orynbasary Ámir Qasenov áskerde drondar qandaı negizgi mindetterdi oryndaıtynyn, ushqyshsyz júıeler Qarýly Kúshterde keń aýqymdy mindetterdi atqaratynyn atap ótti.
«Drondar memlekettik shekarany patrýldeý, soqqy berý mindetterin oryndaý, sondaı-aq ártúrli qamtamasyz etý túrleri boıynsha tapsyrmalardy júzege asyrady. Olardyń qataryna radıoelektrondyq kúres, radıasııalyq, hımııalyq jáne bıologııalyq qorǵanys, ekologııalyq qaýipsizdik, baılanys jáne basqa da baǵyttar jatady», dedi ol.
Ámir Saǵyndyquly atap ótkendeı, áskerı qyzmetshilerdi oqytý Qorǵanys mınıstrliginiń joǵary áskerı oqý oryndary men áskerı kolledjderi bazasynda júzege asyrylady. Áskerlerde oqytý Qarýly Kúshterdiń túrleri men ásker tekterine qaraı oqý ortalyqtarynda júrgiziledi. Sondaı-aq ol drondardy qurastyratyn áskerı qyzmetshilerdi oqytý neni qamtıtyny týraly toqtaldy.
«Oqý baǵdarlamasy teorııalyq jáne praktıkalyq bólimderden turady. Aldymen bilim alýshylar ushqyshsyz júıelerdiń maqsattary men mindetteri týraly jalpy túsinik alady, sodan keıin dronnyń júıeleri men baǵdarlamalyq qamtamasyz etýimen tanysady. Keıin áskerı qyzmetshi sımýlıatorda praktıkalyq daıyndyqtan ótip, keıin naqty ushý tapsyrmalaryn oryndaýǵa kirisedi», dedi ol.
Al bir ushqyshsyz júıeni qurastyrýǵa jumsalatyn qajetti ýaqyt onyń túrine jáne mamannyń daıyndyq deńgeıine baılanysty ózgerýi múmkin.
«Kvadrokopter tıpindegi ushqyshsyz júıeni tájirıbeli maman shamamen 3-6 saǵatta qurastyra alady, al «jańadan úırenýshi» úshin bul ýaqyt 1-2 táýlikke deıin sozylýy múmkin», dedi Á. Qasenov.
Qurastyrylǵannan keıin drondar ártúrli manevrlerdi oryndaý arqyly birqatar synaqtyq ushýlardan ótedi. Bul ushýlar ártúrli aýa raıy jaǵdaılarynda, kúndiz jáne túnde júrgizilip, ushý-tehnıkalyq sıpattamalary rastalady. Atalǵan synaqtardan keıin drondar áskerı bólimderge jiberiledi.
Á. Saǵyndyquly ushqyshsyz avıasııalyq júıeler operatorlaryn daıarlaý týraly da aıtyp berdi. Onyń aıtýynsha, operatorlardy ushýǵa daıarlaý aldyn ala jáne tikeleı daıyndyq kezeńderinen turady.
«Aldyn ala daıyndyq barysynda operator ushqyshsyz júıelerdi, olardyń múmkindikterin zertteıdi, sondaı-aq mindetterdi oryndaýdyń ártúrli tásilderi boıynsha bilimin jetildiredi. Barlaý nysandarynyń sıpattamalaryn meńgeredi jáne sımýlıatorlarda ushý jattyǵýlaryn oryndaıdy.
Tikeleı daıyndyq kezinde operatorlar naqty mindetterdi oryndaýǵa kirisedi, jaǵdaıdy zerdeleıdi, marshrýttardy josparlaıdy jáne qoıylǵan tapsyrmalardy oryndaýdyń ádisteri men taktıkalyq tásilderin aıqyndaıdy», dep túıindedi Ámir Qasenov.
