Bul týraly О́ńirlik kommýnıkasııalar qyzmetinde ótken brıfıngte oblystyq qoǵamdyq densaýlyq basqarmasynyń basshysy Marat Pashımov málimdedi. Onyń aıtýynsha, oblysta medısınalyq uıymdardyń materıaldyq-tehnıkalyq bazasy edáýir tolyqqan. "Qazirgi tańda óńirdegi medısınalyq mekemelerde ókpeni jasandy jeldetý apparattarynyń sany 178-den 332-ge deıin artyp, ósim 46,4%-dy qurady.
Al ottegi stansııasynyń sany 2 esege artyp, 8-ge jetip otyr. Sondaı-aq, 80 birlik oksıgenasııa apparaty (HI-FLOW) satyp alyndy. Ottegi konsentratorlarynyń sany 890 birlikke jetip, ósim 95%-dy qurady. Ottegi núkteleriniń sany 9,7 esege artyp, 205-ten 2005 núktege deıin ulǵaıdy. Bıyl oblystyq bıýdjet esebinen bir dana kompıýterlik tomograf pen 3 dana sandyq rentgen apparattary ornatyldy", dedi basqarma basshysy.
Sonymen qatar oblystaǵy medısınalyq uıymdardyń pýlsoksımetrmen qamtamasyz etilýi 190-nan 3879-ǵa deıin jetip, 95,1%-ǵa artqan. PTR zerthanalarynyń sany 3 birlikten 9 birlikke deıin ósip, kún saıyn 2500-den astam testileýge múmkindik berýde. Koronavırýstyq ınfeksııanyń ekinshi tolqynyna daıyndyq maqsatynda oblystyń medısınalyq uıymdary dárilik zattarmen tolyq qamtamasyz etilgen. Eki aılyq qor rezervi qalyptastyrylǵan.
Túrkistan oblysy
