Joba aıasynda oblystyq bıýdjet, demeýshiler jáne qaıyrymdylyq qorlary arqyly kedeı otbasynyń árbir múshesine medısınalyq, jumysqa ornalasý, azyq-túlik pen turmystyq zattar áperý jáne ózge de máseleler boıynsha turaqty kómek kórsetip, olardyń eńse tikteýine jaǵdaı jasaý kózdelgen. Mysaly, Túlkibas aýdanynda jergilikti ákimdiktiń uıytqy bolýymen 21 otbasy baspanaǵa qol jetkizip otyr.
Sonyń ishinde 6 otbasyǵa demeýshilir esebinen turǵyn úı berilse, 15 otbasy memlekettik baǵdarlamamen baspanaly boldy. Sondaı-aq 9 otbasynyń turǵyn úıi demeýshiler esebinen jóndeýden ótti. Bıyl 9 qarashaǵa deıin «Qamqorlyq» jobasyna qatysýshy 93 otbasyǵa 215 mln teńgeden asa qarjyǵa túrli kómekter kórsetilgen. Atap aıtqanda, «Ferrým Konstrakshn» JShS, «Gramad» gıpermarketi, «Madına» makaron fabrıkasynyń demeýshiligimen ázirlengen azyq-túlik sebetteri «Meıirim» eriktiler tobymen úlestirildi. Buǵan qosa bekitilgen mamandar tarapynan azyq-túlik sebetteri, kıim-keshek, materıaldyq aqshalaı kómek jáne kómir, otyn úıme-úı taratylyp berildi.
Qaıyrymdy is jasaýdy azamattyq paryzy sanaǵan Jetisaı aýdanynyń turǵyndary alty birdeı otbasyǵa baspana syılady. QMDB-nyń 30 jyldyq mereıtoıyna oraı, «Zeket» qorynyń «El úlesi – páterge» jobasy aıasynda baspana taýqymetin tartyp júrgen 6 otbasyǵa barlyq jaǵdaıy jasalǵan jańa úılerdiń kilti tabys etildi. Baspanalardyń jalpy quny 90 mln teńgeni quraǵan.
«Halyq arasynda «jumyla kótergen júk jeńil» degen keremet sóz bar. Osy oraıda árqashanda halyqtyń muń-muqtajyn tyńdap, kómek berip kelgen eldiń anasy atanǵan Jamal apamyzǵa jáne onyń isin jalǵastyryp júrgen uly, belgili kásipker Baharaddın Ablazımovke eldiń atynan alǵysymdy aıtamyn. Aýdanda qaıyrymdylyq arqyly baspana syılaýdyń jarqyn úlgisin Jamal apamyz kórsetip, kópke úlgi bola bildi. Bul rette jergilikti turǵyndardyń erekshe belsendiligin aıta ketkenimiz abzal. Árbir baspanany salý barysynda eriktiler tobynyń jáne jomart jandardyń eńbegi erekshe. Olar irgetastyń qalanǵan sátinen turǵyn úı salynyp bitkenshe istiń basy-qasynda júrdi. Qaıyrymdylyq jasaý arqyly aýdannyń árbir azamaty óziniń qolynda bar dúnıesimen bólisip, muqtaj azamattardyń baspanaly bolýyna óz úlesterin qosýda. Aldaǵy ýaqytta da osyndaı baspana salý úshin jer telimderin tegin bere otyryp, muqtaj jandarǵa qajetti jaǵdaıdy jasaımyz», dedi aýdan ákimi Jamantaı Beısenbaev úılerdi paıdalanýǵa berý rásiminde.
О́z kezeginde baspana taýqymetin 16 jyldan beri tartyp kele jatqan jalǵyzbasty kópbalaly ana Jáýdir Tórehanova jańa qonystanýshylar atynan qaıyrymdy jandarǵa alǵys aıtty.
Baspanamen qamtamasyz etý muqtaj otbasylardyń alańsyz eńbek etip, turmysyn túzeýge yqpalyn tıgizeri anyq. Sondaı-aq turǵyndardyń tabysyn molaıtýǵa memlekettik qoldaýlar arqyly erekshe múmkindik jasalýda. Bir ǵana mysal, Arys qalasynyń turǵyny, 5 balanyń anasy Mereke Samarhanqyzy memlekettik qoldaý arqyly óz kásibin ashqan. Ol bıyl «Bıznes-Bastaý» jobasymen kásipkerlik negizderin oqyp, «Eńbek» baǵdarlamasymen 555 600 teńge kóleminde qaıtarymsyz grant alǵan. Búginde ol – tabysty kásipker. Aımaqta tapsyrysqa táttiler, merekelik torttar daıyndaıdy. Isker ana bolashaqta aýqymdy seh ashýdy josparlap otyr.
Jalpy, Arys qalasy boıynsha shaǵyn jáne orta kásipkerlik sýbektileri sany bıyl 4 myńǵa jýyqtaǵan. Onyń 2 250-i – jeke kásipker, 994-i – sharýa qojalyqtar, 619-y – zańdy tulǵalar. Shaǵyn jáne orta kásipkerlik sýbektilerimen óndirilgen ónim jáne usynylǵan qyzmetter kólemi 21 mlrd 632,1 mln teńgege jetip, ótken jyldyń tıisti kezeńimen salystyrǵanda edáýir artqan.
Shardarada óz tigin sehyn ashqan Qurbankúl Ermanova da qaıtarymsyz grantqa ıe bolyp, quny 555 600 teńgelik sertıfıkat alǵan. «Qolymnan tigin tigý isi kelgen soń osy salada óz bıznes josparymdy sátti qorǵap, qaıtarymsyz grantqa ıe boldym. Shaǵyn kásippen aınalysam dep júrgen azamattarǵa berilip jatqan mundaı qoldaýǵa sheksiz alǵysymdy bildiremin», deıdi jas kásipker.
Jalpy, Shardara aýdanynda «Eńbek» baǵdarlamasy aıasynda 130 azamat qaıtarymsyz grantqa ıe bolǵan.
Túrkistan oblysy
