Shahardyń bas polıseıiniń aıtýynsha, karantındik sharalardy saqtaý maqsatynda 12 arnaıy mobıldi top qurylǵan. Olar qaladaǵy shekteý sharalaryn buzý boıynsha 83 ákimshilik hattama toltyryp, onyń 41-ine 9 mıllıon teńgeden astam aıyppul salǵan.
Jıyn barysynda Asylhan Zaýyrbekov Taraz qalasyndaǵy qylmystyq ahýaldyń jaıyna da toqtaldy. Ol óz sózinde qalada tirkelgen qylmystardyń ashylýy 58 paıyzǵa deıin artqanyn jetkizdi. О́tken jyly bul kórsetkish 51,1 paıyz bolǵan. Al, aǵymdaǵy jyldyń 10 aıynda oblys ortalyǵynda qylmystyq quqyq buzýshylyqtar men teris qylyqtardyń tirkelýi 35,2 paıyzǵa, ıaǵnı 1564 derekke azaıǵan.
О́tken jyly bul kórsetkish 4437 derek bolsa, bıyl 2873-ke tómendegen. Tarazdyń bas polıseıi eseptik kezeńde jasóspirimder qylmysy 26,0 paıyzǵa tómendegenin, byltyr 77 derek tirkelse, bıyl 57 derek tirkelgenin aıtty. Kámeletke tolmaǵandarǵa qatysty jynystyq sıpattaǵy kúsh qoldaný áreketi byltyrǵy jylǵa qaraǵanda nebári 4,8 paıyz tómendegen. Sondaı-aq, sýısıd boıynsha byltyr 7 derek bolsa, bıyl múlde joq eken.
Sonymen qatar, ol Taraz qalasynda bıyl jol-kólik oqıǵalarynan 22 adam qaıtys bolǵanyn, degenmen ótken jylmen salystyrǵanda jol apaty 432-den 311-ge deıin tómendegenin, jaralanǵandardyń sany 592-dan 439-ǵa deıin azaıǵanyn málimdedi.
