Mundaı kómekti múmkindigi bar árbir azamat jasaýy tıis dep sanaıtyn kásipker ıgi isin jarııa etýdi jón sanamaıtynyn sezdirgen. Degenmen, indettiń yqtımal ekinshi tolqynyna daıyndyq jumystaryn kúsheıtken medısına qyzmetkerleriniń jomart jigitke aıtar alǵysy sheksiz. Búginde árbir kómek aýrýhana úshin de, aýdan turǵyndary úshin de mańyzdy. Dárigerlerdiń biliktiliginiń, óz mindetine jaýapkershilikpen qaraýynyń jáne naýqastarǵa qolushyn sozyp qoldaý kórsetken jomart jandardyń qaıyrymdy isteriniń nátıjesinde Túrkistan oblysynda koronavırýs ınfeksııasynan 3 371 naýqas jazylyp shyqqan. Onyń 2 377-de aýrý sımptomsyz ótken.
Qazirgi tańda óńirdegi medısınalyq mekemelerdiń ınfeksııalyq stasıonarlarynda 35 adam em qabyldaýda. Vırýsty pnevmonııamen 29 adam jáne 6 naýqas koronavırýs ınfeksııasymen tirkelgen. Naýqastardyń barlyǵy – eresekter. Onyń ishinde úsh júkti áıel – juqpaly aýrýhanalar bólimderiniń dárigerlik baqylaýynda. Jaǵdaıy qanaǵattanarlyq jáne ókpeni jasandy jeldetý apparatyna tańylǵandary joq.
Jalpy, Túrkistan oblysynda pandemııa bastalǵan sátten bastap COVID-19 deregi rastalǵan
3 444 jaǵdaı tirkeldi. Onyń ishinde 2 394-i – sımptomsyz. Dertke shaldyqqandardyń 1 577-si oblys stasıonarlarynda em qabyldaǵan. Aýrýshańdyq úsh jasqa deıingi balalar arasynda az tirkelgen. Olardyń sany – 44 (2,8%). Al 3 jastan 18 jasqa deıingiler arasynda – 75 (4,8%), 18-den 55 jasqa deıingi eńbekke qabiletti jastaǵy 956 adam (60,6%) aýyrǵan. Koronavırýs, ásirese aǵa býynǵa aýyr tıdi. 55 jastan asqan 502 adam (31,8%) juqtyrǵan. Indetke shaldyqqandardyń kóbi – er adamdar.
Túrkistan oblysy qoǵamdyq densaýlyq basqarmasynyń málimetinshe, búginde aımaqtaǵy ınfeksııalyq stasıonarlarda COVID-19 ekinshi tolqynyna daıyndyq maqsatynda 600 tósektik oryn ázirlengen. Buǵan qosa 340 oryndyq karantındik stasıonarlar jasaqtalǵan. Oqshaýlaý bólimderinde 99 azamat baqylaýda. Pandemııa bastalǵaly oblys zerthanalarynda 254 325 PTR-synamasy alynǵan.
Túrkistan oblysy
