Tanym • 24 Qarasha, 2020

At ábzelderi

78 ret kórsetildi

Qazaqtyń ulttyq-jaýyngerlik oıyn-saıys túrleriniń deni at ústinde nemese jylqy túligin paıdalaný arqyly iske asady. Mysaly, at jarysy nemese báıge túrleri – alaman, jorǵa, taı, qunan, dónen, besti, aıǵyr jarys, sondaı-aq jaýyngerlik oıyn-saıys túrleri – aýdaryspaq, kókpar, qyz qýý, at ústinde sadaq (jamby) atý, teńge ilý t.b. Iаkı osynda aıtylǵan at sporty oıyn-saıys túrlerin oryndaý úshin sáıgúlikpen qatar jylqynyń jabdyǵy, ıaǵnı at ábzelderiniń de alatyn orny erekshe. At ábzelderi dep aldymen er-turmandy, oǵan qosa jylqyny jýasytýǵa nemese basqarýǵa yńǵaıly júgen-noqta, tizgin-shylbyr, ómildirik-quıysqan qatarly jaraqtardy aıtamyz.

Er-turman – atqa miný úshin qolda­nylatyn jabdyq. Onyń túri kóp. Tur­mysta qoldaný múmkindigine qaraı: qa­rııa er, báıbishe er, jigit er, áıel er, bala er t.b. bolyp bólinse, jasaǵan mate­rıalyna baılanysty: qaıyń er, qara­ǵaı er, qurama er, temir er t.b. Al erdi áshekeılep bezendirýine qaraı: altyn er, kúmis er, oıýly er, qurandy er dep atalsa, keskin-kelbeti, ıaǵnı poshymyna baılanysty: qaptaldy er, jaıpaq er, bıik er, saýyrly er, qoqan er, orys er t.b. ataýlary bar.

Erdiń qańqasyna toqym, jeldik, te­bingi, aıyl, quıysqan, ómildirik, qan­jyǵa, úzeńgi, taralǵy nemese úzeńgi baý, júgen, shylbyr, tizgindi qosyp tolyq túrde at ábzelderi dep ataıdy. Ult­tyq muramyzdyń janashyry, sheber usta, marqum Dárkembaı Shoqparulynyń ádip­­tep jazǵan jyryna nazar aýdarsaq:

Súıegin somdap shaptym

taldy qıyp,

Alasa artqy qasy, aldy bıik,

Atqa da, adamǵa da jaıly bul er,

Alsańyz ókinbeısiz maldy jıyp.

 

Er-turman, at-ábzelin kúmistep em,

Kúrdeli is, kóp-aq munda

jumys degen,

Qaqtalǵan appaq kúmis

jalt-jult etip,

 Iаpyrmaı, degizgendeı kim istegen.

 

Shaýjaıy, aýyzdyǵy, sýlyǵymen,

Kekildik, saǵaldyryq, baýlyǵymen,

Shylbyry, shyǵyrshyqty tizginimen,

Symbatty, saltanatty

qundy júgen.

 

Tartpasy, quıysqan men ómildirik,

Úzbelep, áshekeılep, tógildirip,

Dárkembaı degen usta daıarlaǵan,

Kópke arnap kózdiń maıyn

tógip júrip.

 

Oqpanǵa bet taqasań muryn tımes,

Atyńa jalpaq órgen jyrym tımes,

Jaqsy erdi jasaı almas eshbir adam,

Qyry men kókeıine syryn túımes.

 

Toqymyn qaıyp tiktim jeldigimen,

Kóz tartar kisiligi keńdigimen,

Taralǵy, úzeńgisi, qanjyǵasy,

Taralyp túgendeldi endi mine.

Joǵaryda usta aǵamyz aıtqandaı, at ábzelderin daıyndaý sheberlikti talap etetin jumys. Ertede atalarymyz, at ústinde, er jastanyp, tolarsaqtan saz keship júrip, baıtaq dalasyn qorǵaǵan. Sondyqtan da, el aýzynda, «tulpar erdi saqtaıdy, er jerdi saqtaıdy» degen támsil bar.

1

Erdiń aldyńǵy jáne artqy qasy bo­lady. Erdiń kópshigin basyp, attyń jýan qarnyn oraı tartylǵan jýan beldikti pystan dep ataıdy. Erdiń qos qaptalynyń astynda ornalasqan, attyń arqasyn jaýyp turatyn jalpaq kıizdi toqym deıdi. Onyń uzyndyǵy – 120-130 sm, eni – 60 sm kóleminde bolady. Toqym nyǵyz pisirilip, jaqsy ılengen tiri júnnen jasalady. «Tiri jún» dep, kóktemde týǵan marqa qozynyń kúzgi qyrqymyn aıtamyz. Kıiz toqymdy kóbinde bylǵarymen qaptap, jıegin qymbat matamen syryp tigedi. Ony syrmaly bylǵary toqym deıdi. Budan basqa kómkerme toqym degen de bar.

Tebingi – erdiń qos qaptalyndaǵy úzeńgi baýdy basyp turatyn juqa ja­byl­ǵy. Ony jumsaq teriden nemese byl­ǵarydan jasaıdy. Ol toqym men úzeńgi baýdy terden saqtaıdy. Jyraý Ma­hambet О́temisulynyń: «...tebingi ter­ge shirimeı, terligi maıdaı erimeı...» ne­mese «...tebingi teris taǵynbaı, temir qa­zyq jastanbaı, qý tolaǵaı bastanbaı, er­lerdiń isi biter me?» degen tirkester tebin­giniń mazmunyn ashyp tur.

Taralǵy nemese úzeńgi baý – erdiń qaptalyndaǵy oıyqqa ótkizilip, úzeńgige bekitilgen qaıys baýdy aıtady. Baýdy ılengen qaıystan eki nemese úsh eli etip tilip jasaıdy. Jaıshylyqta úzengi baý bir qabat bolsa, jaýgershilik kezinde sarbazdar úzeńgi baýdy birneshe qabattaı­tyn bolǵan. At ústinde turyp sadaq tartý nemese naızalasý kezinde negizgi kúsh úzeń­gi baýǵa túsedi. Sondyqtan da, úzeńgi baý nemese taralǵynyń saıys kezinde ma­ńyzy óte zor bolǵan. Qazaqtyń aýyz­eki sózindegi «úzeńgi baýy segiz qabat, at ústinde shirenip...» degen tirkesi tegin aıtylmasa kerek.

1

Úzeńgi – atqa minýge, sol sııaqty erdiń ústinde eki aıaqty tirep, nyq otyrýǵa, tebinýge múmkindik beretin qural. Úzeńgi negizinen temirden jasalady, ári onyń túri kóp. Qyzdar men áıeldiń úzeńgisi jeńil ári oıýly áshekeıimen kóz tartsa, er adamdar úzeńgisi berik qalyń temirden jasalady.

Júgen – attyń basyna kıgiziletin, mindeti – atty ıesi yrqyna baǵyndyrýǵa kómektesetin ábzel. Júgenniń qurylymy: jelkelik, mılyq, keńsirik, qasqalyq, saǵaldyryq, sýlyq, aýyzdyq jáne tizgin-shylbyrdan turady. Júgenniń túri kóp. Atap aıtqanda: kúmis (kú­mis­telgen) jú­gen, órim júgen, shashaqty júgen, qas­qa júgen, úkili júgen, túı­meli júgen t.b. Júgen attyń basyna aýyr­lyq kel­ti­­retindeı bolmaýy kerek. Sondaı-aq ertede báıbisheler mine­tin jýas jyl­qylarǵa jibek júgen qol­da­natyn bolǵan.

Quıysqan – attyń ústindegi ertoqy­my qııa jerde moınyna qaraı syrǵyp ket­pes úshin, attyń túp quıryǵynan ót­­ki­zip, erdiń artqy qanjyǵalyǵyna be­­­ki­­­tetin qaıystan jasalatyn qural. Qu­­ıys­­qannyń eki jaqtaýy jáne jań­byr­­­lyq-salpynshaq atty jylqynyń sa­ýy­­ryn japqan úzbeleri bolady. Qu­ıys­qan attyń tezek tastaıtyn tyshpasyna kóldeneń turǵandyqtan, keıbir kezderde jylqynyń tezegi quıysqanǵa qystyrylyp qalyp, attyń erkin qımy­lyna kedergi keltiredi. Mundaıdy biz­diń qazaq jaqtyrmaı «quıysqanǵa qys­tyrylǵan boq sııaqty» dep aıtady.

О́mildirik – er artqa qaraı syrǵyp ket­peý úshin, attyń omyraýyn oraı tar­tylǵan qural. О́mildirik – tósbaý jáne aıylbas salpynshaqtardan turady. Tós­baýdyń mindeti – omyraýdaǵy ómil­dirik attyń baýyzdaýyna qaraı syrǵyp ketpeý úshin, bir ushy tós aıylǵa baılanady. О́mildirikti jumsaq qaıystan sándep jasaıdy. Jasalý úlgisi men poshymyna qaraı – órmeli, shytyraly, túımeli, úzbeli, kúmistelgen t.b. túrleri bar.

Aıyl – at ústindegi er-turmandy nyq ustap turatyn, jalpaqtyǵy eki eli qaıys qural. Aıyl erdiń qamshylar jaǵyna bekitilip, attyń baýyrynan ótkizilip, jyrymǵa qosylady. Aıyldy mindetine qaraı – tós aıyl jáne shap aıyl dep bóledi. Keıde aldyńǵy aıyl nemese art­qy aıyl dep te ataı beredi. Shap aıyl tós aıylǵa qaraǵanda uzyn bolady. Ádette tós aıyldy qatty tartyp, shap aıyldy attyń qarnyn qıyp ketpeý úshin bosań tartady. Halyq aýzyndaǵy, «Tós aıyldyń batqanyn ıesi bilmes at biler, Aǵaıynnyń qadirin jaqyny bilmes jat biler» degen máteldiń bolmysy bizdiń sózimizdi tolyqtyryp turǵandaı. Aıyldyń jalpaq taspaly jáne órmeli túrleri bar. О́rimshilerdiń sheberligine baılanysty órim túri – astyly, ústili, tesik, oıyq, qyrly, jaldy, ózekti, saıly t.b. bolyp bólinedi. О́rim 4 taspadan 12 taspaǵa deıin óriledi. О́rý barysynda, aıylǵa shashaq, shoq, kóz, til salyp ásemdeıtin de kezderi bar.

* * *

Sózimizdi túıinder bolsaq, qazaq hal­qy at ábzelderin – turmystyq, sándik, jaýyngerlik maqsatqa oraı ártúrli paı­dalanǵan. Turmystyq maqsatqa: kún­delikti sharýaǵa qajet at ábzelderi jatady. Ony sándemeıdi jáne usaq túlik taı-taıynshanyń terisin paıdalanady. Sándik maqsat úshin jasalǵan ábzelder qataryna – uzatylǵan qyzdyń at ábzeli, as-toıǵa nemese saltanatty jıynǵa baratyn el aǵalarynyń at ábzelderi jáne áýlettik-otbasylyq mura úshin arnaıy sándep jasatqan quraldar jatady. Al jaýyngerlik ábzeldiń ereksheligi – óte berik bolady, naǵyz atan ógizdiń teri­sinen jasalady. Ony sándep jatpaıdy, biraq kóshpendiler shaıqas kezinde at ábzelderine rıtýaldyq tańbalaryn shaptaıtyn dástúr bolǵan.

 

Sońǵy jańalyqtar

Taldyqorǵanda qoǵamdyq kólik órtendi

Aımaqtar • Búgin, 14:41

Qazaqstandyqtar eGov.kz-ke kire almaı jatyr

Tehnologııa • Búgin, 13:45

Uqsas jańalyqtar