Olardy qolǵa túsirý úshin arnaıy is-shara keshe keshke Almaty qalasynyń Medeý aýdanynda júrgizildi. Bes kúdiktini arnaıy jasaqtyń sarbazdary "Gornyı Gıgant" shaǵyn aýdanyndaǵy úılerdiń birinde ornalasqan páterden shyǵyp bara jatqan kezinde ustady.
– Bul topqa Shyǵys Qazaqstan oblysynyń bes turǵyny kiredi, olardyń barlyǵynyń sottylyǵy bolǵan, onyń ishinde múliktik qylmystary úshin. Tutqyndaýdan biraz ýaqyt buryn, qaskóıler úı músheleriniń joqtyǵyn paıdalanyp, almatylyqtardyń páterin tonap, sol jerden aqsha salynǵan seıfti, altyn zattar, kııýge bolatyn kıimder men eki noýtbýkty urlap ketken. Olar ustaldy, zattaı aıǵaqtar tárkilendi jáne qylmystyq is materıaldaryna qosa tirkeldi, QR QK-niń 188-baby 3-bóligi boıynsha sotqa deıingi tergeýdiń biryńǵaı tizilimine tirkeldi. Atalǵan fakti boıynsha is júrgizýdi Medeý aýdandyq Polısııa basqarmasynyń tergeý bólimi aýmaqtyq quramy boıynsha júrgizýde. Ustalǵandar ýaqytsha ustaý ızolıatoryna qamaldy, – dep habarlady Almaty qalalyq Polısııa departamenti bastyǵynyń orynbasary Berik Ábilbekov.
Spıkerdiń aıtýynsha, tergeýdiń osy kezeńinde ustalǵandardyń Medeý aýdanyndaǵy úsh birdeı epızodqa qatysy bar ekendigi anyqtaldy. "Páter urylarynyń" qylmystyq is-áreketi shahardyń basqa aýdandaryn da qamtýy múmkin ekendigi joqqa shyǵarylmaıdy. Osyǵan baılanysty olardyń jeke basy múlik urlaýdyń basqa faktilerine qatystylyǵy tekseriledi.
