Təýelsizdik kúni merekesine oraı óńirdiń barlyq departament, basqarma qyzmetkerleri arasynda ótken is-sharaǵa oblys ákiminiń orynbasary Sáken Qalqamanov qatysyp, sportshylarǵa sáttilik tiledi. Jasyl alańǵa shyqqan 100-ge jýyq memlekettik qyzmetshi ózderiniń sportta da osal emes ekendikterin kórsetti. Saıysqa qatysýshylar arasynda barlyq saqtyq sharalary qatań saqtalǵanyn aıta ketelik. Tórt ashyq alańda qatar ótken kishi fýtbol dodasynda barlyq komanda jeńimpaz atanýǵa baryn saldy. Tartysty ótken oıyndar nátıjesinde oblystyq adamı áleýetti damytý basqarmasynyń qurama komandasy birinshi oryndy jeńip alsa, kúmis júldeni oblystyq jumyspen qamtýdy úılestirý jəne əleýmettik baǵdarlamalar basqarmasy qyzmetkerleri ıelendi. Al, qoǵamdyq densaýlyq basqarmasynyń komandasy qola júldeger atandy. Júldegerler men úzdikterge arnaıy dıplomdar jáne medaldar tabys etildi. Jarys jeńimpazdaryn marapattaǵan oblysy ákiminiń orynbasary Sáken Qalqamanov mundaı sporttyq saıystardyń ár apta saıyn dástúrli túrde ótkizilip turatynyn jetkizdi. «Álemdi sharpyǵan pandemııa bıylǵy jyly birqatar sporttyq sharalardy uıymdastyrýǵa keri ásirin tıgizdi. Sonyń saldarynan memlekettik qyzmetkerler arasynda buqaralyq sport túrlerinen ótkiziletin jarystar keıinge shegerilip kelgenin jaqsy bilesizder. Mine, búgin oblysymyzdyń bas sanıtarynyń qaýlysyna sáıkes, osyndaı sporttyq sharalardy ótkizýge ruqsat etilip otyr. Memlekettik qyzmetkerlerdiń densaýlyǵyn jaqsartý, salaýatty ómir saltyn qalyptastyrý maqsatynda mundaı sporttyq saıystar aldaǵy aptalarda da óz jalǵasyn tabatyn bolady. Naqtyraq aıtsaq, aldaǵy aptada memlekettik qyzmetkerlerdiń qyzdar komandalary arasynda voleıboldan oblys birinshiligin ótkizýdi josparlap otyrmyz», dedi Sáken Amangeldiuly.
