Senattyń Halyqaralyq qatynastar, qorǵanys jáne qaýipsizdik komıteti Palata tóraǵasynyń orynbasary Asqar Shákirovtiń tóraǵalyq etýimen «QR syrtqy saıasatynyń 2020-2030 jyldarǵa arnalǵan tujyrymdamasy: halyqaralyq-quqyqtyq bazany ımplementasııalaý» taqyrybyna arnalǵan dóńgelek ústel ótkizdi.
Kezdesýde halyqaralyq mindettemelerdi iske asyrý jáne jalpyǵa birdeı moıyndalǵan erejeler men standarttardy Qazaqstannyń quqyqtyq júıesine engizý máseleleri qaraldy.
Halyqaralyq mindettemelerdi zań shyǵarý prosesimen jáne quqyq qoldaný praktıkasymen úılestirý jóninde júıeli sharalar qabyldaý qajettigi atap ótildi.
«Adam quqyqtary men bostandyqtaryn qorǵaý qazirgi zamanǵy halyqaralyq qatynastarǵa tyǵyz baılanysty bolǵandyqtyn bıylǵy naýryz aıynda qabyldanǵan Qazaqstan Respýblıkasy syrtqy saıasatynyń 2020-2030 jyldarǵa arnalǵan tujyrymdamasy aıasynda halyqaralyq-quqyqtyq normalardy ımplementasııalaýdyń mańyzy arta túsip otyr. Tujyrymdama maqsatynyń biri – Qazaqstan azamattarynyń is júzindegi múddelerin memlekettiń syrtqy saıasatynyń aldyńǵy shebine kóterý bolyp tabylady, al syrtqy saıasatty damytýdyń qujatta kórsetilgen mazmuny «adam quqyqtary men bostandyqtaryn qorǵaý salasyndaǵy syndarly jáne teń quqyqty yntymaqtastyqty nyǵaıtýdy» qamtıdy», dedi Asqar Shákirov.
Adamzat tap bolyp otyrǵan qazirgi zamanǵy qaýip-qaterler men osyǵan baılanysty halyqaralyq-quqyqtyq tetikterdi jetildirý qajettigi talqylaý nysanasyna aınaldy. Qazaqstan Prezıdenti Qasym-Jomart Toqaev «Jasandy ıntellekt – XXI ǵasyrdyń basty tehnologııasy» halyqaralyq onlaın konferensııasy barysynda bolashaqta jasandy ıntellekt tehnologııalaryn adam men onyń quqyqtaryna zııan keltirmeý týraly memorandým jasaý múmkindigin joqqa shyǵarmady. Memleket basshysy atap ótkendeı, jańa dáýirdiń tabysty bolýy biz jańa tehnologııaǵa engizetin adamgershilik deńgeıine baılanysty bolady.
Tóraǵa orynbasary bul turǵyda azamattardyń óz quqyqtary týraly bilimin jáne olardyń jalpyadamzattyq qundylyqtardy saqtaý mádenıetin arttyrý erekshe mańyzǵa ıe bolatynyn atap ótti.
Syrtqy ister mınıstri Muhtar Tileýberdi kezdesýdiń kún tártibine sáıkes atqarylǵan isterdiń aǵymdaǵy jaı-kúıi týraly habardar etti. Máselen, halyqaralyq sharttardyń memlekettik tiziliminde 4093 halyqaralyq shart tirkelgen bolsa, olardyń 3000-ǵa jýyǵy qoldanysta bolyp otyr. Qazirgi ýaqytta olardy oryndalýy jóninde júıeli túrde monıtorıng jumystary júrgizilip keledi.
Mınıstr sondaı-aq Qazaqstan Respýblıkasy Konstıtýsııasynyń 4-babynyń jańa redaksııasyn iske asyrýǵa baǵyttalǵan halyqaralyq sharttardy retteý salasyndaǵy túzetýleri bar zań jobasy Parlamentke jiberilgeni týraly habardar etti. Qazaqstan Respýblıkasynyń zańdarynan ratıfıkasııalanǵan halyqaralyq sharttardyń basymdyǵy, halyqaralyq sharttar mártebesindegi ózgerister týraly jurtshylyqty habardar etý, sondaı-aq halyqaralyq sharttardy toqtatý tártibi týraly erejeler salalyq zańǵa engiziletin bolady.
Dóńgelek ústel barysynda quqyq qorǵaý jónindegi zańnamany jetildirý, ony halyqaralyq quqyqtaǵy jalpyǵa tanylǵan qaǵıdattary men erejelerge sáıkestendirý, atap aıtqanda, bizdiń elimizdiń Azamattyq jáne saıası quqyqtar týraly halyqaralyq paktiniń fakýltatıvtik hattamalaryna jáne Bala quqyqtary týraly konvensııaǵa qosylý máseleleri qaraldy.
Senatorlar kóterilgen máselelerdiń mańyzdylyǵyn eskere otyryp, zań jobalaryn ratıfıkasııalaýǵa daıyndaý jáne engizý kezindegi is-qımyldardy jan-jaqty úılestirý qajettigine memlekettik organdar ókilderiniń nazaryn aýdardy.
Komıtet tóraǵasy Muhtar Qul-Muhammed dóńgelek ústeldi qorytyndylaı kelip, halyqaralyq sharttardy jasaý jáne oryndaý barysynda shet memlekettermen jáne halyqaralyq uıymdarmen ózara qarym-qatynastarda elimizdiń ulttyq múddelerin eskerý basymdyqqa ıe ekenin atap ótti.
Kezdesý múddeli memlekettik organdar basshylarynyń, Adam quqyqtary jónindegi ýákildiń, halyqaralyq quqyq salasyndaǵy sarapshylardyń jáne Senat janyndaǵy Jas sarapshylar klýbynyń qatysýymen ótti.
Otyrys qorytyndysy boıynsha Úkimet atyna usynymdar qabyldandy.
