Qonaqúı Túrkistannyń mádenı-rýhanı ortalyǵynda, Iаsaýı kesenesine jaqyn, Uly Dala ortalyǵy men Visit Centre Turkistan mańaıynda ornalasqan. Syrtqy beti kóne ǵasyrdyń ǵımarattaryn eske túsiretin Marokko stılindegi eski qam kirpishten soǵylǵan. Orta ǵasyr men qazirgi dástúrlerdi sátti úılestire otyryp, qalanyń stılin tolyqtyra túsken. Bir jyldyń ishinde boı kótergen qonaqúıdiń jalpy alańy Top Tobe jeke banket keshenin qosqanda 9000 sharshy metr bolady. Standartty sanattaǵy 120 nómir bar. Múmkindigi shekteýli adamdarǵa arnaıy jasaqtalǵan bólmeler qarastyrylǵan. «Bul eń aldymen strategııalyq mańyzdy salaǵa úlken úles. Týrızmdi damyta otyryp, Túrkistanǵa kelgen qonaqtar halyqaralyq deńgeıdegi qyzmetti qoljetimdi baǵamen paıdalana alady. Sonymen qatar, qonaqúı Túrkistannyń mádenı-rýhanı ortalyǵyna úılesimdi», dedi quttyqtaý sózinde Arman Jetpisbaı.
Aıta ketelik, Hilton – quramyna túrli sanattaǵy 17 qonaqúı brendi kiretin dúnıejúzine áıgili qonaqúıler jelisi. Álem boıynsha bul jelige 6000-ǵa jýyq qonaqúı kiredi. Hampton by Hilton Turkistan – BI Group pen Hilton Worldwide arasyndaǵy ekinshi birlesken joba.
