Sondaı-aq oblys ákimi jaýapty basqarma basshylarymen birge ákimshilik-iskerlik ortalyqta salynyp jatqan 7,9 jáne 12 qabatty jalpy 89 turǵyn úıdiń qurylys alańynda boldy. Jeti qabatty 7 úıdiń qurylys-montaj jumystary aıaqtalyp, bank arqyly berilgen. Al 24 turǵyn úıdiń aýmaǵyna sý, gaz, elektr qýaty, káriz júıesimen jabdyqtaý, abattandyrý jumystary júrgizilýde. Basym bóliginde arnaıy jerasty avtoturaqtar bolady.
«Áziret Sultan murajaı-qoryǵynyń» aýmaǵy da abattandyrylýda. Botanıkalyq baq, eki birdeı alleıa, dekoratıvti toǵan qurylysy qarqyndy júrýde. Jospar boıynsha munda myńǵa jýyq, onyń ishinde Germanııa jáne Belgııa elderinen arnaıy ákelingen kóshetter, О́zbekstannan satyp alynǵan tut, qaraǵaı, shıe, alma, kashtan aǵashtary otyrǵyzylady. Sondaı-aq 18 myń butalar men Germanııadan satyp alynǵan 14 myń landshafty jáne alpınıstik raýshan gúlderi men sý lalagúlderi egiledi. Topyraqty qunarlandyrý úshin sala mamandary keshendi jumystar júrgizýde. Saıabaqtar jaryqtandyrylyp, tastar tóselip, kesene aýmaǵy oazıske aınalady.
Túrkistan oblysy
