О́ńirlik kommýnıkasııalar qyzmetinde ótken brıfıngte oblystyq qoǵamdyq densaýlyq basqarmasynyń basshysy Marat Pashımov óńirdegi memlekettik PTR zerthanalarynyń sany 3 birlikten 10 birlikke deıin óskenin atap ótti. Zerthanalarda jalpy 369 155 adam tekserýden ótkizilgen. «Medısınalyq uıymdardy dárilik zattar jáne arnaıy qorǵanysh quraldarymen qamtamasyz etý maqsatynda 3,1 mlrd teńge bólindi. Bul qarjylarǵa 361,8 mln teńgege dárilik zattar, 1,6 mlrd teńgege medısınalyq buıymdar, 185 mlnteńgege dezınfeksııalyq eritindiler satyp alyndy. Sondaı-aq ókpeni jasandy jeldetý apparattarynyń sany 178-den 348-ge deıin artty. Qosymsha 4 ottegi stansııasy ornatylyp, 8-ge jetti, 80 birlik oksıgenasııa apparaty (HI-FLOW) satyp alyndy. Al ottegi konsentratorlarynyń sany 890 birlikke jetti. Oblystyq bıýdjet esebinen 1 kompıýterlik tomograf pen 3 sandyq rentgen apparaty ornatyldy. Medısınalyq uıymdarda pýlsoksımetrdiń qamtamasyz etilýi 190-nan 4 069-ǵa deıin jetti», dedi Marat Pashımov.
Oblysta COVID-19 indetin juqtyrǵan medısına qyzmetkerleriniń sany – 214, pnevmonııany 200 adam juqtyryp, 16 adam qaıtys bolǵan. Búginde barlyq qaıtys bolǵan medısına qyzmetkeriniń otbasyna 10 mln tengeden, jalpy 160 mln teńge kóleminde áleýmettik tólem jasalǵan. Sonymen qatar, vırýsty juqtyrǵan 182 mamanǵa barlyǵy 2 mln teńge kóleminde tólemder berildi. Koronavırýs indetimen kúres sheńberinde epıdemııaǵa qarsy is-sharalarǵa tartylǵan barlyǵy39 387 medısınalyq qyzmetkerge tamyz aıyna deıin jumys ýaqytyn esepke alý negizinde 7,8 mlrdteńge qarjylaı ústemeaqy tólendi.
Túrkistan oblysy
