Kollajdy jasaǵan Záýresh SMAǴUL, «EQ»
Biregeı Bilim land
Memleket basshysy Qasym-Jomart Toqaev halyqqa Joldaýynda qashyqtan oqytýdyń kemshilikterin atap ótip, jedel túrde onlaın-platforma ázirleýdi tapsyrdy. «Qashyqtan oqytý isin uıymdastyrýda Úkimettiń jibergen qatelikterin jaqsy bilemiz. Ashyǵyn aıtqanda, áli kúnge deıin naqty bir onlaın-platforma joq. Muǵalimder, oqýshylar jáne ata-analar kúndiz-túni WhatsApp-tan bas kótermeıtin boldy. Tolyqqandy oqý úderisi úshin qajetti barlyq fýnksııalary bar biryńǵaı onlaın bilim berý platformasyn shuǵyl ázirleý qajet», dedi Prezıdent.
Búginde elimizde Bilim land (Online mektep), Daryn.online, Opig, «Sfera» sııaqty platformalar qoldanysqa endi. Buǵan qosa sheteldik Zoom, Google Meet, Microsoft Teams, Google Classroom platformalary, WhatsApp, Telegram messendjerleri qoldanylady. Joǵary oqý oryndarynyń kóbi Zoom, Platonus platformalaryn paıdalanady. Ál-Farabı atyndaǵy QazUÝ «Ýnıver 2.0» atty óz platformasyn jasap shyǵardy.
Qazaqstandyq mektepterdiń 80 paıyzy qoldanatyn «Bilim land» kompanııasy – elektrondy bilim berý naryǵynda 10 jyldan asa tájirbıesi bar ujym. Osy rette atalǵan kompanııanyń jetekshisi Sanjar Kenjehanulyn sózge tartqan edik.
«Bizdiń ujym bilim berýge qajetti kontentti jasaýmen, ony beıimdeýmen jáne soǵan qatysty tehnologııalar men qyzmetterdi taratýmen aı̆nalysady. Biz ortaq mıssııa – barshaǵa qoljetimdi sapaly bilim berý úshin jumys isteımiz. Sonyń ishinde eń aýqymdy jobalarymyzdyń biri – BilimLand.kz platformasy. Orta bilim berý mekemelerine arnalǵan júıe – mektep baǵdarlamasyna saı úsh tilde ázirlengen ınteraktıvti tapsyrmalar men oqytý resýrstaryn usynatyn bilim alańy. Pandemııa jaǵdaıyna baılanysty ótken IV toqsandaǵy qashyqtan oqytýdaǵy tájirbıemizge súıene otyryp, OnlineMektep platformasyn ázirlep shyǵardyq. Qazirgi tańda qashyqtan oqıtyn 4 500 mekteptiń ishinde 3 594-i
bizdiń platformaǵa qosylǵan. Kúnine 1 mln 821 myń qoldanýshy saıttaǵy barlyq qyzmetti qoldanýda. Platforma Qazaqstandaǵy №1 saıt desek, artyq aıtqandyq emes», deıdi S.Kenjehanuly.
Beınekonferensııalardyń sapaly jumys isteýi úshin portaldyń serverlik qýaty kúsheıtilip, platformany 4 mln-nan asa qoldanýshy eshqandaı kedergisiz bir mezette qoldaný múmkindigi jasaldy. Sondaı-aq «Bilim land» kompanııasy ZOOM baǵdarlamasyn ıntegrasııalap, saıtqa engizgen.
Platformadaǵy sabaqtardy ázirleýge elimizdiń orta mektep muǵalimderi atsalysýda. Nazarbaev zııatkerlik mektepteri men eldegi jekemenshik mektepterdiń muǵalimderi sabaqtardy jańartylǵan bilim berý baǵdarlamasynyń mazmunyna sáıkes ázirledi. Sabaq mazmunyn tereńirek túsinýge arnalǵan júıeli konspektiler, sapaly sýretter men anımasııalyq vıdeolar, vırtýaldy zerthanalar jáne beınesabaqtar daıyndaldy. Qazirgi tańda OnlineMektep.kz platformasynda I jáne II toqsannyń 42 páni boıynsha eki tilde 12 myńǵa jýyq cabaq, 210 myń jattyǵý jasaldy. Aldaǵy ýaqytta qalǵan úshinshi jáne tórtinshi toqsan boıynsha daıyn sabaqtar saıtqa júkteledi.
Platformada dúnıe júzi boıynsha úsh jylda bir ret ótkiziletin, mektep oqýshylarynyń bilim jetistikterin baǵalaıtyn halyqaralyq PISA jobasynyń talaptary tolyq qamtylǵan. Mundaǵy basty maqsat – qazaqstandyq oqýshylardyń bilim kórsetkishin álemdik reıtıngte 62-orynnan 30-orynǵa kóterý.
«Qoldanýshylarmen keri baılanys júıeli jolǵa qoıylǵan. Arnaıy baılanys ortalyǵy jumys isteıdi. Kóp usynystar men ótinishter túsip turady. Soǵan sáıkes biz saıtta únemi jańartýlar, tolyqtyrýlar engizemiz. Platformada mektep ákimshiligine, muǵalimder men oqýshylarǵa tıimdi qyzmet usynýǵa barynsha tyrysqanymyzben, oqytý formaty barshamyzǵa úırenshikti bolmaǵandyqtan, qıyndyqtar da bolyp jatady. Keıde ınternet jyldamdyǵynyń tómendigine, baılanys sapasyna, qurylǵynyń jumys isteýine baılanysty qoldanýshylar tarapynan máseleler týyndaýy múmkin. Biraq biz óz qoldanýshylarymyzǵa únemi ashyqpyz», deıdi joba jetekshisi.
Daryn.online repetıtorǵa balama ma?
Elimizdegi kóp qoldanylatyn onlaın bilim alańynyń taǵy biri – Daryn.online platformasy. Bul týraly bizge joba jetekshisi Aıbek Qýatbaev jan-jaqty málimet berdi.
«О́zimiz aýylda týyp-óstik, aýyl mektebinde bilim aldyq. Aýyl balalary úshin repetıtor jaldap oqý, qosymsha bilim alý qoljetimsiz. Aýyl balalary, ásirese bitirýshi synyptar UBT-ǵa daıyndalý úshin qalaǵa baryp, sabylyp júredi. «Nege osyny qolǵa almasqa, onlaın arqyly sheshpeske?» degen oı keldi. Sóıtip bul jumysty 2018 jyly bastaǵanbyz, 2019 jyly qazanda platforma tolyq iske qosyldy. Bilim berý standartyna sáıkes mektep baǵdarlamasynyń barlyq páni boıynsha kontentter ázirlenip, júkteldi. Oqýshy úıinde otyryp repetıtor qyzmetin tólem jasap paıdalanady. Platformada júıeli sabaq kestesi shyǵady. Alǵashqy sabaqty barlyǵy tegin kóredi. О́zine unaǵan pánderdi tańdap, bir aıǵa 2 myń teńge tólep, jazylady. Áýel basta elektrondy bilim naryǵyna enip, repetıtorlyqqa balama jasaý maqsatymyz bolǵan-dy», deıdi A.Qýatbaev.
Qazir platforma respýblıkada keń kólemde taralady, Mońǵolııa, QHR-dan da Qazaqstan tarıhy men Qazaq tili pánderin osy platformamen oqyp otyrǵan qoldanýshylar bar. Elimizdiń
1 491 mektebi, elordanyń 40 mektebi atalǵan joba boıynsha kelisimshart jasasyp, Daryn.online platformasy qoldanýda. Qoldanýshylarynyń sany – 3 mln 200 myń.
Sapa turǵysynan qaraıtyn bolsaq, qoldanýshylar tarapynan shaǵymdanýshylar da, rızashylyǵyn bildirýshiler de bar. Jalpy, sapasy ázirge 5-tik shkalanyń 4,1 baǵamynda tur. Damytatyn, jetildiretin tustary kóp. Kóbine jyldam ınternettiń jetispeýshiligi kedergi bolady eken. Munda da ınternet trafıkteriniń álsizdiginen beınesabaqtar, kontentter durys ashylmaı, qatyp qalyp jatady. «Kontenttiń sapasyna baılanysty qoldanýshylar, pedagogter tarapynan eskertýler, shaǵymdar bolsa, bizde arnaıy fokýs-top jumys isteıdi. Shaǵymdy qabyldap, aqaýdy, ne kemshilikti eki kún ishinde túzetip, keı tustaryn tolyqtyryp otyramyz. Árıne, qazir aqparat kóp, kún saıyn jańarýda. Sondyqtan kontentti árdaıym damytyp otyramyz», deıdi joba jetekshisi.
Qoldanýshylar ne deıdi?
Aıjan MUQATAEVA,
Nur-Sultan qalasy Abaı Qunanbaıuly atyndaǵy №87 mektep-gımnazııasynyń geografııa pániniń muǵalimi:
– Biz Microsoft Teams jáne Bilim Land platformalaryn qoldanamyz. Bilim Land-tiń Online mektep júıesi óte yńǵaıly. Munda sınhrondy jáne asınhrondy sabaq júrgizý múmkindigi bar, ıaǵnı platformadaǵy usynylǵan daıyn kontentti qoldana otyryp sabaqty júrgizýge bolady. Oqý baǵdarlamasyna sáıkes konspektiler, tapsyrma mátinderi qamtylǵan. Ásirese, Twig-Bilim-de qazaq tilinde jaqsy, mazmundy beınedárister berilgen, sabaǵymyzǵa paıdalanyp júrmiz. Microsoft Teams platformasyn da paıdalanamyz. Bul platformanyń ereksheligi birden 250 oqýshyǵa deıin qamtı alady. Munda da balalarǵa slaıd, prezentasııalar kórsetýge bolady. BJB tapsyrmalaryn qurastyratyn fýnksııalary jaqsy. ZOOM sekildi ýaqyty shekteýli emes, trafıgi de tıimdi. Microsoft Teams-tiń taǵy bir ereksheligi toppen jumys isteýge yńǵaıly. Oqýshylardyń barlyǵynda quraly bar. Az qamtylǵan, kóp balaly otbasylarǵa ákimshilik tarapynan noýtbýktar, planshetter taratyldy. Internetke qosylý múmkindigimiz joq degen ata-analarǵa roýterler (ınternet) berildi. Qoryta aıtqanda, mektebimizde onlaın oqýǵa barlyq múmkindik jasalǵan.
Álııa IMAShEVA,
Túrkistan oblysy Túlkibas aýdany Balyqty aýylynyń I.Rybalko atyndaǵy orta mekteptiń qazaq tili men ádebıeti páni muǵalimi:
– Bizdiń aýdanǵa Daryn.Online platformasy bekitilgen. Platformanyń resýrstary, sapasyna shaǵym joq, alaıda tolyqqandy qoldana almadyq. ZOOM-men de óte almadyq. Sebebi aýylda ınternet baılanysy nashar. Úıine Wi-Fi ornatqan bala sabaqqa qosyla alady, ornatpaǵan bala qosyla almaıdy. Mysaly, bir synypta 23 oqýshy bolsa, sonyń 7-inde ǵana Wi-Fi bolady. Qol telefonnyń trafıgimen bilim berý platformalarynyń kontentin ıgerý múmkin emes. Tipti ár balanyń bas-basyna telefon joq. Bir úıde 3-4 bala bir telefonǵa telmirip otyrady. Ata-anasynyń telefonyn qoldanatyndar bar. Qalaǵa, aýdanǵa jol júrse ata-anasy telefondy ózimen alyp ketip, tapsyrmalaryn der kezinde oryndaı almaı qalatyn kezder bolady. Osynyń bári bilim sapasyna keri áser etýde. Internettiń jyldamdyǵy tómen, beınesabaqtar ashylmaıdy. Sol sebepten biz sabaqty barshaǵa qoljetimdi WhatsApp mesendjeri arqyly ótemiz.
Gúljazıra YSQAQOVA,
Nur-Sultan qalasyndaǵy respýblıkalyq fızıka-matematıka mektebiniń muǵalimi:
– Biz Google Meet platformasyn qoldanamyz. Jalpy, Google ónimderin bizdiń mektep 2017-2018 oqý jylynan beri qoldanyp keledi. Iаǵnı fizmat.kz domenin mekteptiń barlyq oqýshylary men muǵalimderi paıdalanady. Naýryz aıynan bastap onlaın oqýǵa kóshkende Google Meet platformasyn qoldana bastadyq. Google – álemge tanymal braýzer. Múmkindikteri óte kóp. Jamdoard taqtasy, Google formasy arqyly bizge test jumystaryn alý óte tıimdi. Barlyq qujatymyz, oqýshylardyń jumysy Google-dıskte saqtaýly turady. Bilim Land, Daryn.Online sııaqty bilim alańdarynda daıyn kontentter usynylǵan. Bizde oǵan ruqsat etilmeıdi. О́zimizdiń Fizmat Media kontentimiz bar. О́zimniń Youtube arnamdy ashqanmyn, sabaqty sonda júktep qoıamyz.
Átirgúl TÁShIM,
jýrnalıst
