Aqtaý qalasynyń turǵyny Samıra Gasanova 2020 jyldyń 15 jeltoqsanynda bosanǵan edi. Júktilik kezeńi aýyr bolǵandyqtan dárigerler áıeldi júktiliktiń 30-shy aptasynda operasııa jasap, bosandyryp alǵan. 25 jastaǵy áıel 1 ul men 3 qyzdy dúnıege ákeldi. Sábıler – otbasynyń tuńǵyshtary eken.
«Qýanyshymdy jasyra almaı turmyn. Ata-anamyzdyń tóbesi kókke jetkendeı boldy. Balalarymnyń aman-esen jaryq dúnıege kelýine sebepshi bolǵan dárigerlerge otbasymnyń atynan alǵysymdy aıtamyn», deıdi Samıra Gasanova.
Dárigerlerdiń aıtýynsha, tórtemderdiń biri – 1 keli 390 gr bolsa, eń kishisiniń salmaǵy – 1 keli 190 gr. Shaqalaqtar kúsh jınaǵansha 36 kún boıy perınataldyq ortalyq dárigerleriniń jiti baqylaýynda bolǵan.
Ata-anasy nárestelerdi Rasýl, Fanara, Aıla jáne Narın dep atady.
Mańǵystaý oblystyq Ana perınataldyq ortalyǵynyń dáriger neanotology Toıdyq Jumaǵambetova: «Byltyr bizdiń ortalyqta 8610 bala jaryq dúnıe esigin ashty. Onyń ishinde 2 úshem men 147 egiz bala dúnıege kelgen», dedi ol.
Mańǵystaý oblysy bala týý kórsetkishinen respýblıka boıynsha sońǵy 3 jyl boıy kósh basynda keledi. Byltyr aımaqta 21753 sábı dúnıe esigin ashqan.
