Bıyldan bastap StartDrama teatr laboratorııasymen jeti jas jazýshynyń jeti pesasyn jeti jas rejısser sahnalaıdy. «Týǵan kúnińmen, Anashym!» – solardyń alǵashqysy.
Sý jańa pesa búgingi qoǵamdaǵy otbasylyq problemalardy qaýzaıdy. Qarapaıym ári tragedııaly taqyryptyń sahnaǵa kelýi týrasynda spektakl rejısseri: «Qazaq teatrlarynda kóbine klassıka qoıylady. Jas, jańa dramatýrgtarǵa kóńil bólinbeı jatyr. OzgeEpic sııaqty kishkentaı jerde úlken ónerdi nasıhattap, olqylyqtyń ornyn toltyrǵymyz keledi. Sondyqtan jalpy ónerge janashyr kez kelgen adamǵa ashyqpyz», deıdi.
Qoıylymda bir-biriniń tirshiliginen múldem beıhabar aǵaıyndy úsheý anasynyń týǵan kúnine jınalady. Qara shańyraqta bári báz baıaǵy qalpynda. Sonda da týǵan baýyrlar birtúrli jatyrqaıtyn sııaqty. Bálkı, kúıbeń tirlik olardy bir-birinen baıaǵyda-aq alystatyp jibergen bolar.
Basty róldegi Erdáýletti akter Nurjan Asylhan, ortanshy ul Baqdáýletti Erkebulan Mýsın, al úıdiń kenjesi Syrymdy Nurbol Qumarsha oınaıdy. Úsheýi de Sábıt Muqanov atyndaǵy Soltústik Qazaqstan oblystyq qazaq sazdy-drama teatrynda óner kórsetken.
Avtor shyǵarmashylyǵyndaǵy sátti shyqqan alǵashqy pesa «Táýelsizdik tolǵaýy» baıqaýynda otbasy qundylyqtaryn nasıhattaıtyn úzdik úsh pesanyń biri atanǵan. Teatrlarda zamanaýı taqyryptardy qozǵaıtyn shyǵarmalar az ekenin eskersek, atalǵan týyndy kórermen qaýymdy jańa bir keńistikke alyp keldi. Jańa dramany elorda sahnasynda kútemiz.
