29 qańtar kúni saǵat 18:00-de belgisiz bireý polısııaǵa «Qostanaı qalasyndaǵy saýda úıinde jarylys bolady», dep habarlaǵan. Kezekshi bólimge kelip túsken habarlamada jarylystyń naqty qaı saýda úıinde bolatyny jazylmaǵan soń, polısııa dereý oblys ortalyǵyndaǵy eń iri degen «Mart», «Qostanaı Plaza» saýda ortalyqtarynda júrgen 2 myń 300-den astam adamdy evakýasııalady. Oqıǵa ornyna polısııa kúshterinen bólek, jedel medısınalyq járdem, ózge de tótenshe qyzmetter jetken. Biraq saýda ortalyqtarynyń eshqaısynan bomba tabylmady.
Kelesi kúni lańkes polısııaǵa taǵy bir habarlama jiberedi. Bul joly qurylys materıaldaryn satatyn iri saýda ortalyǵynan 87 adamdy tysqa shyǵarýǵa týra keldi. Bul joly da saýda ǵımaratynda eshqandaı jarylǵysh zat joq bolyp shyqty.
Aqpannyń birinde polısııa departamentine elektrondyq poshta arqyly avtovokzal aýmaǵyna jarylǵysh zat qoıylǵany týraly taǵy bir habarlama kelip túsken.
«Arnaıy mamandar ǵımaratty túgel tekserip shyqty. Eshqandaı jarylǵysh zat tabylǵan joq. Avtovokzaldan 40 adam evakýasııalandy», dedi oblystyq polısııa departamenti ekstremızmge qarsy is-qımyl basqarmasy bastyǵynyń orynbasary Erlan Sembın.
Qazir osy oqıǵaǵa qatysty tekserý-izdestirý sharalary júrip jatyr. Polısııa málimeti boıynsha, turǵyndardy 4 kún qatarynan dúrliktirip qoıǵan jalǵan aqparatty bir-aq adam taratyp otyrýy múmkin.
