Atalǵan sharaǵa EAEO úkimetteriniń basshylary, Eýrazııalyq komıssııa jáne TMD atqarý komıtetiniń jetekshileri, sonymen qatar, sıfrlandyrý salasynyń sarapshylary men mamandary qatysyp jatyr.
Qazaqstan Prezıdenti pandemııadan keıingi kezeńdegi sıfrlandyrý máselesi jaıyndaǵy oıymen bólisti.
«Bolashaq – tehnologııalar men ınnovasııalardyń enshisinde ekenin jaqsy túsinemiz», dedi Qasym-Jomart Toqaev.
Memleket basshysy Qazaqstanda jasandy ıntellekt tehnologııalaryn jáne aýqymdy derekterdi taldaýdy damytý týraly aıtty. Budan bólek Prezıdent EAEO elderiniń sıfrly yntymaqtastyǵy boıynsha birqatar ózekti baǵytty atap ótti.
«Sizderdi bizdiń elimiz úshin asa mańyzdy sharada kórgenime qýanyshtymyn. Mártebeli qonaqtardyń arasynda jeti eldiń úkimet basshylary, TMD Eýrazııalyq ekonomıkalyq komıssııasy atqarý komıtetiniń jetekshileri bar. Bul forýmnyń mańyzdylyǵyn arttyra túsedi. Bizde memlekettik qyzmettiń 90 paıyzy elektrondy formatta kórsetiledi. Daǵdarys kezinde 6,5 mln adam memlekettiń qoldaýyna ıe boldy. Bilim beretin mekemelerdiń barlyǵy qashyqtan oqý úrdisine kóshti. Elimizde 15 mln-nan astam adam ınternetti qoldanady. Bolashaq – tehnologııalar men ınnovasııalardyń enshisinde ekenin jaqsy túsinemiz. Bul salada básekelestik óte joǵary. Sarapshylardyń pikirinshe 2021 jyly tehnıkalyq jáne tehnologııalyq naryq jáne baǵdarlamalyq sheshimder jasandy ıntellektige baǵattalady. Symsyz ǵalamtor men sandyq júıelerdiń úlesi 35 paıyzǵa artyp, 12 mlrd AQSh dollaryna jetedi. 2025 jylǵa qaraı 5G tehnologııasy kásiporyndarǵa ózderiniń málimetterin 70 paıyzǵa deıin óndeýge múmkindik beredi. Qazaqstan jasandy ıntelektini damytýdyń jolyn belgilep aldy», dedi Qazaqstan Prezıdenti úndeýinde.
Forýmda óńirlik jáne jáne jahandyq deńgeıdegi sıfrlandyrý salasy, sıfrlyq transformasııanyń jańa strategııalary men jańa tehnologııalar salasyndaǵy trendterdi qalyptastyrý, sondaı-aq halyqaralyq yntymaqtastyqtyń aldaǵy qadamdary men perspektıvalaryn talqylaıdy.
Qazaqstandyq IT-jobalardy qoldaý jáne jańa naryqqa shyǵý múmkindigi, óńirlik áriptestermen iskerlik qatynastardy ilgeriletý jáne sıfrlandyrý jobalaryn tanymal etý – forýmnyń negizgi taqyryby. Osy forýmda COVID-19 pandemııasyna baılanysty týyndaǵan jahandyq máseleler de nazardan tys qalmaıdy.
Forým barysynda sıfrlyq jobalardyń onlaın kórmesi uıymdastyryldy. Sonymen qatar, EAEO Premer-Mınıstrleri men jetekshi halyqaralyq sarapshylardyń qatysýymen plenarlyq sessııa bolady. Forým offlaın jáne onlaın formatta ótýde. Aıta keteıik, «Digital Almaty» forýmy osymen tórtinshi jyl qatarynan uıymdastyrylyp otyr.
