Shardara aýdandyq polısııa bólimi tabıǵat qorǵaý polısııasynyń qyzmetkerleri men sý resýrstaryn qorǵaý jónindegi ınspektorlar birlesip, túnde reıdtik is-sharalar júrgizgen.
Sý qoımasynyń jaǵalaýynda elektrotokty qarmaqtyń kómegimen balyq aýlap otyrǵan er adam polıseılerdiń jaqyndaǵanyn kóre salyp, oqıǵa ornynan jasyrynýǵa tyrysqan. Biraq tártip saqshylarynyń qyraǵylyǵy arqasynda brakoner birden ustaldy.
Polısııa qyzmetkerleri zańsyz balyq aýlaǵan Maqtaaral aýdany turǵynynan rezeńke qaıyq, balyq aýlaý quraldaryn jáne zańsyz aýlanǵan 15 keli balyq tárkiledi.
Polısııa qyzmetkerleriniń habarlaýynsha, atalǵan jaıt QR QK-niń 335-baby (Balyq resýrstaryn, basqa da sý janýarlaryn nemese ósimdikterin zańsyz óndirý) boıynsha SDTBT-de tirkelgen. Qazirgi ýaqytta sotqa deıingi tergeý amaldary júrgizilip jatyr.
