Aqıyq aqynnyń týǵan kúnine oraı ótken sharada jastar Muqaǵalı jyrynan shashý shashyp, lırıkalyq ánderin tartý etti. Budan bólek aqynnyń óleńderin jatqa biletin, oblystyń atyn respýblıka kóleminde tanytyp júrgen jas aqyndar Muqaǵalıǵa arnalǵan arnaý óleńderin oqydy. R.Seıtmetov atyndaǵy sazdy-drama teatrynyń akteri Talǵat Qarynbaevtyń rejısserligimen sahnalanǵan qoıylym kópshilik kóńilinen shyqty. Muqaǵalıdyń jastyq shaǵy, súıgen jary Lashynǵa degen yntyzar sezimi, qyzy Maıgúldiń qazasyákelgen orny tolmas ókinishin akterler joǵary deńgeıde jetkize aldy. Týyndy «Men ólemin qyryqtyń beseýinde» dep aqynnyń ózi aıtqandaı, ómiriniń sońǵy kezeńderimen qorytyndylandy.
Keshke qatysqan kompozıtor, ǵalym, jýrnalıst Bekjigit Serdáli, aıtysker aqyn, oblystyq máslıhat depýtaty Bekarys Shoıbekov, oblystyq qoǵamdyq damý basqarmasy basshysynyń orynbasary Dáýren Sarıev uıymdastyrýshylar men qatysýshylarǵa aıryqsha alǵysyn bildirdi. "Muqaǵalı aqynnyń shyǵarmashylyǵy qazirgi qazaq qoǵamynda, ásirese, keıingi býyn jastardyń arasynda úlken tanymaldylyqqa ıe. Sonyń aıqyn dáleli-búgingi ádebı kesh. Osyndaı mándi, maǵynaly keshter arqyly aqyn shyǵarmashylyǵynyń odan ári nasıhattalyp, ómirsheń bolaryna kámil senemin", degen Dáýren Sarıev aqynnyń toıy jalǵasyn tabatyndyǵyn jetkizdi.
