Byltyr jastarmen ótken kezdesýde aýdan ákimine Amalhan Tólebek jastardyń jınaǵyn shyǵarý jóninde usynysyn jetkizgen bolatyn. Ol aýdan ákimi Ulasbek Sádibekovtiń tarapynan qoldaý taýyp, 14 – 29 jas aralyǵyndaǵy 20 aqynnyń shyǵarmalary alǵash ret jaryq kórgen jyr jınaqqa enip otyr.
Jas aqyndardyń shyǵarmalary engen kitaptyń tusaýkeser rásimine qatysqan aýdan ákimi óleńimen órligin tanytyp, zamandastaryn jaqsylyqqa úndeıtin, eldik pen birlikti tý etken memleketshil jastar qaı kezde de qoǵamnyń eń belsendi toby retinde tanylatynyn atap ótti.
«Jas aqyndardyń qarym-qabileti ártúrli bolǵanymen, bárine birdeı múmkindik berildi. Kitap – qundy dúnıe, ári estelik. Saıram topyraǵynda qanshama birtýar azamattardyń kindik qany tamǵan. Bul, árıne bizdiń halyqtyń daladaı darqandyǵy men janynyń jomarttyǵyna, joldasqa adal, qonaǵyn syılaıtyn keń peıiline buıyrǵan taǵdyrdyń tartýy bolar. Qoǵamǵa qaltqysyz qyzmet etken keshegi Qurmanbek Jandarbekov, Oshat Rahym, Ersin Qoıbaǵar, Tursynaı Orazbaeva syndy azamattardyń izin jalǵap, týǵan jerdiń jaqsy atyn shyǵaratyn – búgingi dara, sanaly, daryndy jastar. Saıram aýdanynda jas aqyndardyń kóptigi meni qýantty. Olardyń shyǵarmashylyǵyn jınaqtap, bir kitapqa engizý – úlken jetistik. Sondyqtan da jas aqyndardyń jyr jınaǵyn shyǵarý usynysyna qoldaý tanyttyq. «Jastar jyrlaıdy». Kitaptyń atyn osylaı qoıdyq. Endeshe, jastarymyz jaqsylyqtyń jarshysy bolyp, ıgilikti jyrlaı bersin. Shyǵarmashylyq jolyndaǵy alǵashqy qadam jastardy dańǵyl jolǵa, bıik belesterge bastasyn!», dedi Ulasbek Sádibekov quttyqtaý sózinde.
Al jastardyń atynan sóz alǵan Amalhan Tólebek mundaı qoldaý shabyttandyryp, boıǵa senim uıalatqanyn jetkizdi.
Aýdandaǵy barlyq kitaphanalar, mektepter men kolledjder jáne kitap súıer qaýymǵa tegin taratylatyn kitaptyń redaktory – óńirge belgili aqyn Nurǵısa Tóremuratov. Almaty qalasyndaǵy «Úsh qııan» baspahanasynda basylǵan «Jastar jyrlaıdy» kitaby 5 bólimnen turady.
