Ortalyqtyń negizgi maqsaty – ulttyq mádenıet pen taǵlymdy tarıhty, tunyq tárbıe men ónegeli ádebıetti óne boılaryna tereń sińirgen zııaly qaýym ókilderi men qoǵam qaıratkerleri, aqyn-jazýshylar men qalamger-tilshilerdiń eleýli eńbekteri arqyly parasatty qoǵam qalyptastyrý. Bul rette Sybaılas jemqorlyqqa qarsy is-qımyl agenttigi Mádenıet jáne sport mınıstrligimen birlesip, el aýmaǵynda ornalasqan kitaphanalarda «Parasatty jol» ortalyǵyn ashý bastamasyn qolǵa alǵan.
Kitaphanada ótken ıgi sharada biregeı jańa jobanyń maqsaty men mindeti ortaǵa salynyp, ortalyqtyń aldaǵy jumys jospary tanystyryldy. Keleli jıynǵa elimizge belgili jazýshy Marhabat Baıǵut, Sybaılas jemqorlyqqa qarsy is-qımyl agenttiginiń Túrkistan oblysy boıynsha Departamenti basshysynyń birinshi orynbasary Mıras Qarǵabaı, qarymdy qalamgerler men qoǵam belsendileri, BAQ ókilderi, sondaı-aq oblysqa qarasty aýdandyq ortalyqtandyrylǵan kitaphanalar júıesiniń mamandary beınebaılanys arqyly qatysty.
Paıymdy pikirler men oramdy oılar ortaǵa salynǵan sharada sóz alǵan Mıras Asqarbaıuly ıgi bastama Túrkistan óńirinde adaldyq atmosferasyn qalyptastyrýda aıryqsha mańyzǵa ıe ekendigin atap ótti. Sondaı-aq jıynǵa qatysýshylar oblysqa qarasty 392 kópshilik kitaphanalarda «Parasatty jol» ortalyǵyn ashý talaı jastyń sanasyna silkinis jasaýǵa jáne oqyrman qaýymnyń tanym-túısigine izgi oı qaldyrýǵa, barmaq basty, kóz qysty áreketterden alshaq bolyp, izgilikti isterdiń izin jalǵastyrýǵa edáýir yqpal etetinine senimdi ekendikterin bildirdi.
