Tárbıelenýshilerdiń búgingi turmys-tirshiligi keń kólemde talqylanǵan alqaly jıynǵa Arys qalasynyń ákimi Murat Qadyrbek, Departament basshysynyń birinshi orynbasary Mıras Qarǵabaı, oblystyq adamı áleýetti damytý basqarmasynyń basshysy Rahymbek Jolaev jáne oblysqa qarasty balalar aýylynyń dırektorlary, sondaı-aq beınebaılanys rejımi arqyly Májilis depýtaty Álııa Ábsemetova qatysyp, ata-ananyń qamqorlyǵynsyz qalǵan búldirshinderdiń qalaýy men usynys-pikirlerin tyńdady.
Balalar aýylynyń dırektorlary birqatar usynystaryn ortaǵa saldy. Atap aıtsaq, túrkistandyq tárbıelenýshilerdi Túrkistan qalasyna tirkep, úı alý kezegine turǵyzýda týyndaıtyn máselelerdi sheshý, balalardy jazǵy demalys kezinde Kókshetaý, Qapshaǵaı qalalaryndaǵy «Baldáýren» oqý-saýyqtyrý lagerine jiberý, 2002 jyldan beri kúrdeli jóndeý jumystaryn kórmegen «Baýyrjan otbasy úlgisindegi balalar aýylyn» jańartý, «Tóle bı otbasy úlgisindegi balalar aýylyna» tıesili 10 gektar jer telimin ıgerýge yqpal etý máseleleri boıynsha usynystar aıtyldy. Sondaı-aq jetim balalar men ata-ana qamqorlyǵynsyz qalǵan balalarǵa arnalǵan uıymdardy kezeń-kezeńmen qysqartý úshin tárbıelenýshilerdi asyrap alýǵa, patronatqa, qomqorshylyqqa alýǵa kıeli mekendegi azamattarymyz yqylas bildirse degen janashyrlyq nıetterin jetkizdi. Oblys boıynsha jalpy sany 175 jetkinshek tárbıelenip jatqan 3 balalar úıiniń búgingi áleýetinen keń maǵlumat alǵan Álııa Ábsemetova atalǵan usynys-tilekterdi aldaǵy ýaqytta Májilis otyrysynda nazarǵa salatynyn aıtty.
