Keshe Ortalyq kommýnıkasııalar qyzmetinde Premer-Mınıstrdiń birinshi orynbasary Baqytjan Saǵyntaev bastaǵan birqatar mınıstrler baspasóz máslıhatyn ótkizdi. Onda elimizdiń áleýmettik-ekonomıkalyq damý úrdisteri saralanyp, osy jyldaǵy ekonomıkalyq damýdyń qorytyndysy shyǵaryldy.
Keshe Ortalyq kommýnıkasııalar qyzmetinde Premer-Mınıstrdiń birinshi orynbasary Baqytjan Saǵyntaev bastaǵan birqatar mınıstrler baspasóz máslıhatyn ótkizdi. Onda elimizdiń áleýmettik-ekonomıkalyq damý úrdisteri saralanyp, osy jyldaǵy ekonomıkalyq damýdyń qorytyndysy shyǵaryldy.
Brıfıngke Ekonomıka jáne bıýdjettik josparlaý mınıstri E.Dosaev, Kólik jáne kommýnıkasııa mınıstri A.Jumaǵalıev, О́ńirlik damý mınıstri B.Jámishev, Qarjy vıse-mınıstri R.Dálenov pen Statıstıka isteri agenttigi tóraǵasynyń orynbasary J.Jarqynbaev qatysty. Brıfıngke moderatorlyq etken Altaı Ábıbýllaev aıaqtalǵaly turǵan jyldyń jetistikteri jóninde aıtty. «Elbasy aıqyndaǵan «Qazaqstan-2050» Strategııasyn júzege asyrýdyń birinshi jyly jemisti qorytyndylanyp otyr deýge negiz bar. Sondaı-aq, bıylǵy jyly elimiz álemdegi básekege qabiletti 50 memlekettiń qataryna qosyldy. Osy baspasóz máslıhatynda memlekettik baǵdarlamalardyń júzege asyrylý barysy men Elbasynyń Úkimetke júktegen tapsyrmalary qalaı oryndalyp jatqany jóninde sóz bolady», dedi moderator.
– Bıylǵy jyly elimizdiń Údemeli ındýstrııalyq-ınnovasııalyq damý baǵdarlamasy aıasynda 11 myńnan astam turaqty jumys orny quryldy, – dep bastady sózin Úkimet basshysynyń birinshi orynbasary. – Jyldyń aldyn ala qorytyndylary eldiń áleýmettik-ekonomıkalyq damýynyń turaqty ekenin kórsetti. Ekonomıkanyń ósimin Elbasy tapsyrǵan 6 paıyz deńgeıinde qamtamasyz ete aldyq. Inflıasııalyq úderister 5 paıyzdan artpaı otyr. Al, jumyssyzdyq deńgeıi 5,2 paıyzdy quraıdy. Jyl boıy ınvestısııalyq belsendilik artyp, negizgi kapıtaldaǵy ınvestısııa ósimi 8,7 paıyzdy qurady. Bul daǵdarystan keıingi kezeńdegi eń joǵary jyldyq kórsetkish bolyp tabylady, dedi B.Saǵyntaev.
Premer-Mınıstrdiń birinshi orynbasarynyń aıtýyna qaraǵanda, ónerkásip salasynyń damýyna Údemeli ındýstrııalyq-ınnovasııalyq damý baǵdarlamasy yqpal etken. «О́nerkásip pen taý-ken óndirisinde, sondaı-aq, óńdeý salasynda damý qarqyny qalypty saqtalyp, mashına jasaý boıynsha jyldyq ósý kórsetkishi 15 paıyzǵa arta tústi. Mundaı qomaqty tabysqa qol jetkizýge negizinen ÚIID memlekettik baǵdarlamasynyń iske asyrylýy yqpal etýde. Atalǵan baǵdarlama aıasynda 2010 jyldan beri 2,5 trln. teńgege 638 joba júzege asyrylyp, 67 myń turaqty jumys orny quryldy. Bıylǵy jylǵa keler bolsaq, 400 mlrd. teńge somasynda 125 joba el ıgiligine berilip, 11 myńnan astam turaqty jumys orny ashyldy», dedi ol.
Kelesi sóz kezegin alǵan Ekonomıka jáne bıýdjettik josparlaý mınıstri de aǵymdaǵy jyl jaqsy kórsetkishtermen qorytyndylanǵaly otyrǵanyna toqtaldy. «Ekonomıkanyń ósýine makroekonomıkalyq jaǵdaı aıtarlyqtaı yqpal etti», dedi E.Dosaev. Al Qarjy vıse-mınıstri R.Dálenov: «Bıylǵy jyldyń 10 aıynyń qorytyndysyna saı, taýarlar boıynsha memlekettik satyp alýdaǵy jergilikti úles 86 mlrd. teńgeni nemese 40,1 paıyzdy qurady. 1 qazandaǵy jaǵdaı boıynsha, memlekettik qaryz 4 trln. 74 mlrd. teńge boldy. Bul ishki jalpy ónimge shaqqanda 1,9 paıyzdy quraıdy. Muny tómen kórsetkish dep aıtýǵa bolady. Memlekettik kepil boıynsha qaryz 121 mlrd. teńgeni quraıdy. 9 aıdyń qorytyndysy boıynsha úkimettik bereshek deńgeıi qaýipsiz shekti mólsherde», dedi.
О́ńirlik damý mınıstri B.Jámishev aımaqtardaǵy áleýmettik-ekonomıkalyq máseleler týraly baıandap, túrli memlekettik baǵdarlamalardyń jergilikti jerlerde júzege asyrylý barysymen tanystyrdy. Sondaı-aq, salaǵa qatysty jańadan daıyndalǵan zań jobalary jóninde de áńgimelep, olardyń tıimdi tustaryn taratyp aıtyp berdi. Ol respýblıka aýmaǵyn uıymdastyrýdyń bas shemasyna arnaıy toqtalyp, qala qurylystarynda bul ıgiliktiń qandaı paıdasy bolatyndyǵyn taratyp aıtty. Mundaı bas shema elimizde tuńǵysh ret jasalypty. B.Jámishevtiń aıtýyna ılansaq, óńirlerdi damytý barysynda shemanyń keltirer paıdasy mol bolmaq.
– Kólik jáne kommýnıkasııa mınıstrligi úshin 2013 jyl jemisti boldy. Birinshiden, biz Elbasynyń tapsyrmasy boıynsha kólik ınfraqurylymyn jan-jaqty damytý týraly memlekettik baǵdarlama daıyndadyq. Atalǵan baǵdarlamada 30 myń shaqyrym avtomobıl jáne 8 myń shaqyrymnan astam temirjoldaryn jóndeý, Aqtaý portyn keńeıtý, 300 temirjol beketin kúrdeli jóndeýden ótkizý men áýejaılardy jańǵyrtý kózdelgen. Munymen qatar, jol boıyndaǵy 260 servıs nysandaryn, 45 avtostansa men 9 avtobeketti, 1 myńnan astam taksı turaqtaryn salý, sondaı-aq, jańadan temirjol, avtobýs jáne áýe marshrýttaryn ashý syndy kóptegen sharalar josparlanǵan, – dedi A.Jumaǵalıev.
Mınıstr «Batys Eýropa–Batys Qytaı» magıstrali jobasy týraly da baıandady. Bıylǵy jyldyń ózinde 2 200 shaqyrym respýblıkalyq mańyzy bar joldar jóndelipti. Sonyń ishinde, «Batys Eýropa–Batys Qytaı» dálizi boıynda 5 oblystyń aýmaǵy arqyly ótetin 1 853 shaqyrym joldyń qurylys jumystary júrgizilgen. Josparlaǵandaı, 806 shaqyrym joldaǵy qozǵalys ashylyp, paıdalanýǵa berilgen. Mınıstrliktiń kelesi jylǵy jospary boıynsha, shamamen 180 shaqyrym jol ashylyp, el ıgiligine beriletin kórinedi. Al 2015 jyly dálizdi rekonstrýksııalaý jumystaryn tolyq aıaqtaýdy josparlap qoıypty.
– Ortalyq-ońtústik, ortalyq-shyǵys marshrýttaryn damytý aıasynda «Astana – Temirtaý», «Astana – Pavlodar», «Almaty – Qapshaǵaı» jol telimderinde qurylys jumystaryn bastadyq. Kelesi jyly atalǵan jol telimderindegi jóndeý jumystary tolyq aıaqtalady. Sonymen qatar, qurylysqa jańa tehnologııalar engizý boıynsha, «mıkrosıýrfeısıng» tehnologııasyn jáne kópirlerdi salýda polıýretandyq tirek bólshekterin qoldana bastadyq. Kelesi jyldan bastap monolıtti temir betondy kópirlerdi salamyz jáne jyly asfaltti paıdalanamyz, – dedi sala basshysy.
Baspasóz máslıhatyn B.Saǵyntaev qorytyndylady.
Nurbaı ELMURATOV,
«Egemen Qazaqstan».
