Medısına • 26 Aqpan, 2021

Dáriger bolý úshin – júrektilik pen meıirim kerek

12 ret kórsetildi

Memleket basshysy Qasym-Jomart Toqaev deni saý ıntellektýaldy ultty qalyptastyrý jáne jańa jahandyq syn-qaterlerdi eskere otyryp, bilim, ǵylym, densaýlyq saqtaý, mádenıet pen sportty damytýǵa basymdyq berip otyr. Koronovırýspen kúres kezinde dárigerlerge degen qurmet arta túskeni belgili. Sebebi adam ómirine arasha túsetin dárigerlik mamandyqty tańdaý úlken jaýapkershilikti júkteıdi, dep habarlaıdy Egemen.kz

Shymkent qalasynda 123 densaýlyq saqtaý mekemesi bar. Onda 4 myńnan asa dáriger men 10 myńǵa jýyq orta býyndy medısına mamany jumys jasaıdy. Dáriger bolý oǵaı emes, al «naǵyz dáriger» ataný qıyn dep jatady. Sondaı altyn qoldy dárigerlerdiń biri shalǵaı ornalasqan eldimekendegi emhanada naýqastardy emdeýde.   

Alısher Isahodjaev Shymkent qalasy Saıram turǵyn úı alabynda ornalasqan №12 qalalyq emhanada konsýltatıvti-dıagnostıkalyq kómek kórsetedi. Aq halatty Alısherdiń esimi Qaramurt, Aqsýkent, Tólebı aýdandarynyń turǵyndaryna da tańsyq emes. Olar munda dáriger qabyldaýyna arnaıy izdep keledi.

Altyn qoldy otashy 18 jyldan beri densaýlyq saqtaý salasynda jumys istep keledi. Jaraqat alǵan nemese hırýrgııalyq aýrýlarǵa shaldyqqan naýqastarǵa sapaly ota jasap, el alǵysyna bólengen. Almaty, Nur-Sultan qalalarynda biliktiligin artyryp kelgen. 2014 jyldan beri joǵary sanatty maman-balalar hırýrg dárigeri.  Emhanada balalar hırýrg dárigeri retinde týma dısplazııasy bar nárestelerge ýaqytyly em taǵaıyndap, oń nátıjelerge jetken.

1

Ujymyna da syıly maman qosymsha kásipodaq tóraǵasy, ári azamattyq qorǵanys jáne tótenshe jaǵdaılar boıynsha jaýapty maman. Alısher Bahtııaruly jaqsy dáriger eshýaqytta jetken dárejesinde toqtalyp qalmaýy qajet dep sanaıdy.

«Dáriger bolý úshin aldymen júrektilik pen meıirimdilik kerek. Sonymen birge, kásibı deńgeıin ómir boıy, eń bolmaǵanda 5-10 jylda bir ret emes, birneshe ret joǵarylatyp turý qajet. Prezıdentimiz básekege qabiletti bolýdy tapsyrdy. Osy maqsatta únemi izdeniste bolyp, turǵyndarǵa kómek kórsetip, alǵystaryn alsaq basty maqsatymyzǵa jetken bolamyz», deıdi dáriger-hırýrg.

Uqsas jańalyqtar