Pavlodar óńirinde 15-ke jýyq kóz aýrýlaryn emdeıtin, operasııa jasaıtyn emhanalar bar. Kópshiligi oblys ortalyǵynda ornalasqan. Mysaly, oblys ortalyǵyndaǵy G.Sultanov atyndaǵy oblystyq aýrýhananyń oftalmologııalyq bólimshesin joǵary sanatty bilikti oftalmolog-dáriger Qasymhan Tileýbaev basqarady. Kóz emdeý bóliminde zamanaýı oftalmologııalyq qural-jabdyqtarmen emdep, túrli kúrdeli operasııalar jasalyp keledi. Bólimshe dárigerleri zamanaýı jabdyqtarmen – oftalmologııalyq koagýlıasııalaýshy lazerde, kogerentti tomografta, ýltradybystyq operasııalyq júıe arqyly emdeý sharalaryn júrgizedi. Ortalyqta jylyna 4 myńnan astam operasııa jasalady, kórý qabatyn lazer arqyly emdeıtin múmkindik te bar. Jańa lazerli apparattardy qoldanǵannan beri oftalmologııalyq bólimshede em alatyn naýqastardyń kezegi azaıdy.
Oftalmologııalyq bólimshe dárigerleri lızıng boıynsha alynǵan eń zamanaýı quraldarda – oftalmologııalyq koagýlıarly lazerde, kogerenttik tomografta, INFINITI, STELLARIS ýltradybystyq operasııalyq júıesinde jumys isteıdi. Ortalyq kóz hırýrgııasyna ımplantasııalyq jolmen operasııa jasaý qolǵa alyndy. Glaýkomaǵa qarsy lazerlik operasııa jasalady. Optıkalyq kóz tomografy satyp alyndy. Lazerli apparat, mıkroskop, tigissiz ota jasaıtyn mashınalar bar.
Búginde balalar da smartfon men gadjet qoldanady. Osydan-aq kóz aýrýlarynyń qalaı paıda bolatyny, tipti 5-6 jastaǵy balalardyń kórý qabiletiniń kúrt nasharlaýy baıqalýda. Bul kóz emhanalarynda, mektepterde, kópshilik júretin oryndarda smartfon, gadjetterdi qalaı paıdalaný jaıly ata-analarǵa túsindiretin, kóz aýrýynan saqtandyratyn aqparattyq jumystyń qajettigin de baıqatady.
– Árıne, aqparattandyrý kez kelgen syrqattyń aldyn alady. Biz arnaıy medısınalyq jabdyqtardyń kómegimen tekseremiz, emdeımiz, túrli otalar da jasalady. Eń bastysy, barlyq dárigerler sekildi kóz dárigerine de sezimtaldyq pen janashyrlyq, kózi aýyrǵan adamǵa kóńil bólý, jan jylýy qajet, – deıdi Q.Tileýbaev.
Jýyrda oblys ortalyǵyndaǵy Á. Bekturov kóshesi, 103 mekenjaıynda «Kóz emdeý emhanasy» ashyldy. Emhanada kózdiń kórý qabiletin jaqsartatyn lazerlik túzetý jasalady. Oftalmologııalyq ortalyq «Bıznestiń jol kartasy 2025» baǵdarlamasy boıynsha memlekettik qoldaý negizinde jańa ǵımaratqa ornalasty. Buǵan deıin óńirde kóz emdeýdiń túrli qyzmetteri usynylǵanymen, kórý qabiletine lazerlik ota jasatý úshin shetelge barý qajet bolatyn-dy. Endi mine, alystan jasalatyn lazerlik operasııalardy jergilikti jerde júrgizýge múmkindik beretin jańa tehnologııalary bar ortalyq ashyldy. О́ńir turǵyndary úshin ereksheligi bar bul jobanyń tıimdiligi de osynda. Oblys ákimdiginiń málimetinshe, 2016 jyldan bastap jumys isteıtin emhanaǵa bıyl «Ortalyqty qaıta qurý jáne qaıta jabdyqtaý» barysynda atalǵan baǵdarlama boıynsha 213 mln teńgeden astam jeńildetilgen nesıe berilgen. Joba sátti aıaqtalyp, jýyrda emhana paıdalanýǵa berildi. Emhanada dıagnostıkalyq keshen jáne táýlik boıy jumys isteıtin stasıonar bar. Endi ortalyqta jalpy kóz patologııasyn anyqtaý jáne emdeý, sondaı-aq kózdiń buldyraýy, glaýkoma, kózdiń artqy bólikterine otalar jasalady. Aldaǵy aıda ortalyqta kózdiń kórý qabiletin jaqsartatyn lazerlik túzetý júrgizile bastaıdy.
– Qazir emhanada quramyn jergilikti mamandar quraıtyn 6 oftalmohırýrg bar. Keńeıtilgennen keıin mamandardy da kóbeıtý oıymyzda. О́ıtkeni qazirden-aq emhana kelýshiler az emes. Eger buryn jyl saıyn 2,5 myń pasıentti qabyldap, 1 myń adamǵa deıin operasııa jasaǵan bolsaq, endi bul kórsetkishter 2 esege ulǵaıýy tıis, – deıdi bas dáriger Aıjan Ahmerova.
Taǵy bir ereksheligi, táýlik boıy jumys isteıtin stasıonar arqyly tegin medısınalyq kómektiń memlekettik kólemi sheńberinde emdelýshilerdi qabyldaýǵa daıyn. Bul oblys ortalyǵyndaǵy ózge kóz emdeıtin emhanalardaǵy kelýshiler júktemesin de jeńildetedi.
– Kózdi lazerlik korreksııalaý tehnologııasy elimizge alǵash ret 2005 jyly keldi. Tájirıbe jınaqtalyp keledi. Operasııa jasalǵannan keıin kóz aýyrmasa da qoldy tyıýǵa týra keledi. Qyz-kelinshekterge boıanýǵa bolmaıdy. Kózge tamyzatyn dári-dármekter men kóz kútimine qajet keńesterimizdi jazyp beremiz, – deıdi oftalmolog dáriger Marat Sembın.
Oftalmolog dárigerlerdiń aıtýynsha, kózdi esh ýaqytta qolmen ýqalaýǵa, súrtýge bolmaıdy, tek taza, jumsaq shúberekpen súrtý kerek. Jaz aılarynda tikeleı túsetin kún sáýlesinen jáne shań tozańnan qorǵanyp kózildirik kıgen de durys.
Pavlodar oblysy
