Mańǵystaýda mal sharýashylyǵymen birge balyq sharýashylyǵynyń da mańyzy zor bolyp, talaı jataqtyń aýzyna as salyp, talaı kópestiń baıyǵan ústine baıı túsýine sep bolǵany tarıhtan belgili. Teńiz ben balyqshylyqqa qatysty san alýan hıkaıalar, balyq sharýashylyǵy salasynyń qaıratker eńbekkerleri týraly qyzǵylyqty áńgimeler, teńiz aıdynynda bolǵan oqıǵalar týraly shejireli syrlar – Mańǵystaý óńirinde umytylmaıtyn estelikterdiń biri.
Balyqshylarǵa qoıylatyn eskertkish te osy maqsatta bolmaq.
– Bul bizdiń ótken tarıhymyzda eleýli eńbegi sińgen ardagerlerge degen qurmettiń sımvoly bolýy tıis. О́skeleń urpaqtyń jadynda ótken tarıhymyz jańǵyryp turýy úshin atalǵan demalys orny men eńseli eskertkishtiń alar orny, atqarar róli zor, – deıdi Túpqaraǵan aýdanynyń ákimi Aıbek Qosýaqov. «Balyqshylar» demalys ornynda kireberis arka, sporttyq shynyǵý alańy, balalar alańy, avtoturaq pen shatyrly oryndyqtar jáne eńseli «Balyqshylar» eskertkishi ornatylady. Músinshi B.Salaev týyndysynyń bıiktigi – 3,60 metr bolsa, tuǵyr bıiktigi 2,20 metrdi quraıdy. Taǵy bir qýanyshtysy – «Balyqshylar» demalys orny bıyl paıdalanýǵa beriledi.
Iá, Mańǵystaý balyqshylary qandaı qurmetke de laıyq. Jańalyq jaqsy bolǵanymen, el arasynda eskertkishtiń sulbasy talqyǵa tústi. Biri aýlaýǵa tyıym salynǵan bekireni ustap turǵan balyqshyǵa shúılikse, ekinshisi bir shabaq ta qappaǵan bos aýǵa min taqty. Kelesilerge ekeýi eki jaqqa qaraǵan balyqshylardyń turysy unamasa, bireýler balyqshylardyń kıimine syn aıtty.
Jalpy eskertkish máselesinde kúni búginge deıin «áp, bárekeldi!» deıtindeı qoshemetke ıe bolyp kórmegen Mańǵystaýda osylaısha taǵy bir eskertkish boı kótermek. Biraq áp degennen áńgimesi mázdi emes...
Mańǵystaý oblysy
