Oblystyq kópbeıindi aýrýhanasynyń onkologııalyq bólimine óńeshtiń qaterli isigi asqynǵan 52 jastaǵy Shý aýdanynyń turǵyny kelip túsken. Dárigerlerdiń málimetinshe, boıy men salmaǵy qalypty normaǵa sáıkes kelmeıtin naýqastyń jaǵdaıy alǵashynda óte nashar bolǵan. Alaıda, turǵynnyń ómirin saqtap qalý úshin shuǵyl túrde sheshim qabyldanyp, atalǵan naýqasqa tájirıbeli dáriger Jandos Seıdahmetovtyń basshylyǵymen ota jasaldy.
Oblystyq densaýlyq saqtaý basqarmasynyń málimetinshe, ota barysynda óńeshke totaldy rezeksııasymen qorektik tútikshe ornatylyp, óńesh boıyndaǵy óskinder alynyp tastalypty. Sondaı-aq, asqazandy jumyldyrý em-sharalary júrgizilgen. Alǵashqy otadan keıin-aq naýqastyń jaǵdaıy jaqsaryp, arnaıy tútikshe arqyly tamaqtana bastaǵan. «Naýqasqa birneshe márte operasııa jasaý qajet. Kelesi joly biz toq ishektiń kesindisinen óńesh arqyly qorektik zattardyń ótkizgishtigin qalpyna keltirmekpiz. Iаǵnı, tabıǵı jolmen tamaqtanýyn jolǵa qoıamyz», deıdi oblystyq kópbeıindi aýrýhanasy hırýrgııa bóliminiń meńgerýshisi Jandos Seıdahmetov.
Búginde naýqastyń jaǵdaıy jaqsaryp, úıine shyǵaryldy. Ota sátti ótkendikten, oǵan endi hımııalyq terapııa qabyldaý qajet emes. Aıta keteıik, Jambyl oblystyq kópbeıindi aýrýhanasy onkologııalyq qurylymynyń dárigerlerimen alǵash ret úshinshi satydaǵy onkonaýqastarǵa jasalǵan eki ota da sátti ótken.
