«Oqytýshylarǵa laıyqty jalaqy tólep, olardyń qalypty jumys atqarýy úshin jaǵdaı jasaý - joǵary bilim sapasyn arttyrý úshin mańyzdy. Memleket basshysy Qasym-Jomart Kemeluly Toqaev Ulttyq qoǵamdyq senim keńesiniń otyrysynda joǵary oqý oryndaryndaǵy pedagogıkalyq-oqytýshylyq quramnyń jalaqysyn arttyrýǵa qatysty tapsyrma bergen bolatyn. Nátıjesinde 2019 jylǵy qyrkúıekte Bilim jáne ǵylym mınıstrligine tikeleı baǵynyshty JOO oqytýshylarynyń jalaqysy 20 paıyzǵa, keıin 2020 jylǵy qyrkúıek aıynda taǵy 20 paıyz ulǵaıtyldy», dep jazdy mınıstr Facebook-paraqshasynda.
Degenmen, onyń atap ótýinshe, qabyldanǵan is-sharalarǵa qaramastan jalaqy kólemin áli de arttyrý qajet. Bul rette, bolǵan jalaqynyń bazasynyń tómen bolýyna baılanysty, tipti jalaqyny 20-40 paıyzǵa ulǵaıtý da jetkiliksiz bolyp otyr. Máselen, QazUÝ-da oqytýshynyń ortasha jalaqysy 108 myń teńge bolsa, H. Dosmuhamedov atyndaǵy Atyraý ýnıversıtetinde 105 myń teńge, Qorqyt Ata atyndaǵy Qyzylorda ýnıversıtetinde – 101 myń teńge, al Qaraǵandy ındýstrıaldy ýnıversıtetinde 99 myń teńge. Mundaı jalaqy mólsheri oqytýshylardy asa yntalandyra qoımaıtyny anyq. «Keıbir joǵary oqý oryndary oqytýshylardyń jalaqysyn kóterý kezinde laýazymdyq jalaqy mólsherin negizge alǵan. Al laýazymdyq jalaqy mólsheri oqytýshylardyń túrli qosymsha aqylardy qosa alǵandaǵy naqty jalaqysynan tómen ekenin aıta ketken jón. Basqa joǵary oqý oryndary jalaqyny pedagogıkalyq júktemeni kóbeıtý arqyly arttyrdy. Nátıjesinde birqatar oqý ornynda oqytýshy stavkasynyń kólemi 900 saǵatqa deıin jetti», dedi ol. Ashat Aımaǵambetov osyǵan baılanysty Memleket basshysynyń tapsyrmasyn oryndaý úshin eki norma bekitilgenin aıtady.
«Birinshi. 2021 jyldyń qyrkúıeginen bastap shtattaǵy oqytýshylar úshin mınımaldy jalaqy mólsherin belgileý. Iаǵnı, 2021 jyldyń qyrkúıeginen bastap BǴM-ge vedomstvolyq baǵynyshty joǵary oqý ornynda shtattaǵy oqytýshy aıyna kem degende 200 myń teńge, aǵa oqytýshy – 230 myń teńge, qaýymdastyrylǵan professor – 260 myń teńge; professor 350 myń teńge (ulttyq joǵary oqý oryndarynda – 400 myń teńge) alýy tıis. Bul jalaqynyń eń tómengi mólsheri bolýy tıis. Sondaı-aq ár joǵary oqý orny oqytýshylardyń belgili bir jetistikteri úshin basqa da yntalandyrý tólemderin belgilep, tóleı alady», dedi mınıstr.
Onyń atap ótýinshe, ekinshi normada pedagogıkalyq júktemeniń maksımaldy kólemin 1 stavka úshin 680 saǵattan asyrmaý kózdelgen.
«Árıne, bul pedagogıkalyq júktemesi atalǵan kórsetkishten tómen JOO-lardy (jylyna 450 nemese 500 saǵat) eshteńege mindettemeıdi. Iаǵnı, saǵat sanyn belgilengen 680-ke deıin jetkizý mindeti turǵan joq. Oqytýshyǵa berilgen 1 stavka kólemi 700-900 saǵat nemese odan joǵary bolatyn joǵary oqý oryndary saǵat sanyn 680-ke deıin tómendetýi kerek. Bul buıryqty erte qabyldap jatqanymyzdyń ózindik sebebi bar: 2021 jyldyń qyrkúıegine deıin JOO basshylaryna ózderiniń shyǵystaryn qaıta josparlap, ońtaılandyrý jáne kiristerin ulǵaıtý úshin ýaqyt beremiz. Atalǵan sheshim joǵary oqý oryndaryndaǵy ákimshilik-basqarý personaly men pedagogıkalyq-oqytýshylyq quramnyń araqatynasyn ózgertýge, basqa da mańyzy basym emes shyǵystardy qysqartýǵa jáne bıýdjetterdiń shyǵynyn qaıta qaraýǵa májbúrleıtini anyq. Biz rektorlarmen 2021 jyldyń qyrkúıegine deıin tıisti jumys júrgiziletini týraly kelisimge keldik. Prezıdenttiń bul tapsyrmasynyń oryndalý barysyn JOO dırektorlar keńesteri men Bilim jáne ǵylym mınıstrligi baqylaýda ustaıtyn bolady», dedi mınıstr.
